Становиска асоцияцийох польопривреднїкох подзелєни

автор ртв/танюґ
19.6k Опатрене

БЕОҐРАД – Предсидатель Асоцияциї польопривреднїкох Мирослав Киш вчера вечар виявел же представителє парастох бешедовали з министерку польопривреди Снежану Боґосавлєвич Бошкович, алє же розгварки були нєуспишни. Як гварел Киш, министерки предочели же нє сцу бешедовац о амандманох, лєбо о вименкох дзепоєдних членох Закона о польопривредней жеми, алє вимагаю його цалосне поцагованє.

– Министерка вислухала нашо арґументи и гварела же будзе бешедовац з премиєром Вучичом. Тераз шицко на Министерстве и на Влади Сербиї, а ми предлужуєме з протестами – гварел Киш за РТВ.

На другим боку, представителє других здруженьох польопривреднїкох думаю же предложени вименки лєпши од терашнїх предписаньох, а же протести политично иницировани.

Секретар Банатскей асоцияциї польопривреднїкох Ненад Манич оценєл же найвекши галайк настал коло можлївосци же би инвеститоре достали 30 одсто державней жеми, цо, як гварел – нє точне. Златан Дюрич з Униї польопривредних продуковательох гварел же вименки нє одвитую дзепоєдним интересним ґрупом, окреме на сиверу Войводини. Нови Закон потримую и Асоцияция продуковательох млєка Войводини и Здруженє „Спас” з Кралєва.

Тоти здраженя оценєли же вименки Закона о польопривредней жеми оможлївя змоцньованє польопривредних ґаздовством пред уход Сербиї до Европскей униї, та же жем годни куповац лєм реґистровани ґаздовства.

ПОВЯЗАНИ ТЕКСТИ