БЕОҐРАД – Нови закон о ґенетски модификованих орґанизмох (ҐМО) будзе пририхтани у присустве явносци и з нїм нє будзе дошлєбодзене пестованє ҐМО нашеня у Сербиї, виявел вчера державни секретар у Министерстве польопривреди и защити животного штредку Данило Ґолубович.
– Влада Сербиї нє дошлєбодзи пестованє ҐМО нашеня у Сербиї – гварел Ґолубович новинаром на представяню студиї о ефектох вименки Закона о ҐМО и тарґовищу сої.
Ґолубович гварел же треба зоз законом пооштриц контролу пестованя польопривредних културох, а вименки предписаньох о ҐМО потребни и пре приключенє Сербиї ґу Европскей униї и Шветовей тарґовинскей орґанизациї.