РУСКИ КЕРЕСТУР – У керестурским хотаре сезона тлаченя слунечнїку скоро закончена. Високи температури нє начкодзели тей култури, та урожай досц добри и руша ше од 2,2 до 3 тони по гольту, цо подобне як влонї.
Слунечнїк витлачени з коло 90 одсто парцелох, остали лєм дзепоєдни на хторих є познєйше пошати, лєбо на нїх стала вода.
Слунечнїк и сою у Руским Керестуре одкупюю „Аґрохома”, „Юарбис” и „Аґрокерестур”, шицки плаца 38 динари за килограм, а пенєжи ше достава даскельо днї по придаваню.
Почала и сезона кошеня сої и за тераз цена 38 динари. Яснєйшу слику о тогорочней продукциї сої годно видзиц аж у наиходзацим периодзе, алє обчекую ше слабши урожай як влонї.
– Кошенє сої почало прешлого тижня, алє кошене лєм коло три днї, цо барз мало часу за спатранє тогорочного роду, а за тераз мож повесц же ше урожай руша од єдней до 2 тони по гольту – гвари Иґор Варґа з подприємства „Аґрокерестур”.