Вера Пеле, III, Руски Керестур

КРАСОТИ МОЄЙ РОВНЇНИ

Пришла яр и зоз ню красна хвиля и красни чувства.

Днї вше длугши. Слунко уж вше моцнєйше швици. Дує благи витрик. Шицко ожелєнєло. У трави єст прекрасни квецики у шицких фарбох. Древка розквитли, шицко пахнє. Птички весело чвиринкаю. Вяри єст барз красни швета. Найволїм Пасху и нєдзелю кед идземе до церкви. Мама вше порихта кошарку. Помагам єй най до нєй покладземе: пасочку, шунку, сирец, колбаси, вайца, хрин, маселко, писанки и вельо квецики. У церковней порти стретам своїх товаришох, сушедових и родзини. У церкви после служби паноцове пошвецаю кошарки и шицких нас. Шицки зме радосни и нашмеяни. После пошвецаня шицки идземе дому и єме тото цо зме пошвецали у кошарки.

Цала тота яр за мнє окремна и приємна.

Ґреґор Рац, VI, Руски Керестур

КЕД БИМ БУЛА ПТИЦА

Любим буц чловек, алє бим любела буц и птица.

Любела бим буц птица прето же бим теди лєцела. Видзела бим вельо далєй як цо видзи чловек. Направела бим себе фине гнїздо на древе. Кед би була жима, пошла бим до цеплих крайох. Пила бим воду зоз фонтанох. Лєцела бим вшадзи по швеце. Дружела бим ше зоз другима птицами. У парку бим глєдала людзох хтори би ми руцали отрушинки.

Верим же би ми було интересантно буц птица, бо бим лєцела шлєбодно, алє и далєй волїц буц чловек.

Матеа Бучко, VI, Руски Керестур

МОЙ ПАПАҐАЙ

Я мам дома вельо животинї. Опишем вам свойого папаґая.

Мой папаґай ше вола Кики. Вон белаво-било-шиви. Я и мама го купели од сушеда. Вон ма пол рока. Мой любимец  люби скакац з конара на конар и люби чвиринкац. Я мам дома ище три папаґаї.

Я барз любим свойого папаґая прето же є фини.

Давид Тимко, IV, Коцур

ЯР

Яр почина 21. марца. Теди ше починаю зявйовац фарби, шицко почина роснуц. Любичици, тулїпани, подшнїжнїки квитню. Днї длугши, слунковити и цеплєйши, а доставаме и перши курчата, мачата и щенята. Пчоли починаю лєциц, зберац полен зоз кветох и правиц меду. Приблїжує ше и Пасха, та фарбиме писанки. Птици прилєтли зоз цеплих крайох, бо у нас уж цеплєйше.

Калина Лакнер, III, Шид

ЯРНЄ РАНО У МОЇМ ДВОРЕ

            Ярнє рано у моїм дворе мирне и фине. Слунко швици, птички шпиваю, а шицко коло мнє желєне и красне. То час кед природа приноши радосц. Накадзи видзим же вонка цепло, такой сом радосна. Вец ше идзем преблєчиц, та ше ролераме. Так ше бавиме до ноци. То єден мой дзень од велїх, а найприємнєйше ми рано.

Емина Сеґеди, III, Руски Керестур

МОЙ КОНЬ ДЮРИ

Мой конь Дюри зна барз швидко бежац. Вон зна прескочиц препреченя. Бул на велїх змаганьох и вельо раз победзел. Маме вельо трофеї. После змаганя го почасцим зоз яблучком. Вон их барз люби.

Иван Планчак, I, Руски Керестур

МОЙ ЛЮБИМЕЦ

          Мойо любимци ше волаю Пуфна и Симонида. Вони пси и припадаю раси биґл. Тераз вам виприповедам яки мойо пси добри чуваре мойого дому.

          Пуфна и Симонида сцигли до нас єдного лєтного дня кед ше мой пайташ Симон селєл зоз свою фамелию до новей хижи. Понеже Симон нє мал места за псох у своїм новим дворе, його оцец ше порадзел зоз моїм оцом же би пси остали у нас єден час. Ми ше шицки барз зрадовали. Симонида и Пуфна барз весели пси. Любя ше бавиц зоз дзецми, та ше часто виходзим бавиц вонка зоз нїма. Єдного дня ше мойо шестри и я бавели на дворе, медзитим, пред нами ше створел гад! Ми ше шицки дакус злєкли, алє нас Пуфна и Симонида такой пришли виратовац и одплашиц гада. Були зме барз щешлїви же нас нашо любимци виратовали и же нам так добре чуваю дом.

       Я любим своїх псох прето же ше сцу бавиц, та мам вше дружтво за бависко.

Виктор Клашня, III, Коцур

ТАТО

Високи, ма белави очи. Ма штерацец єден рок. Добри, фини, мудри мой тато. Вон ше занїма зоз древом. Зоз древа пилї дески. Люби ношиц роботни шмати, панталони на треґери. Гоби му уживац у природи. Я зоз моїм татом любим ходзиц на Миколков салаш. То салаш мамового дїда и там крашнє уживац з татом.

Доротея Чизмар, II, Руски Керестур

МОЙ ЛЮБИМЕЦ

          Мой любимец ше вола Медо. Вон пес, раси Бордер коли, а тераз вам виприповедам яки то тот мой пес.

         Медо ма билу и чарну шерсц. Вон ма белави очи хтори ше швица на слунку. Медо нєбарз вельки. Люби ше бавиц зоз метлу, а найволї ше оганяц. Кармим го кажди дзень. Облюбене єдзенє му косци. Кажди дзень го шейтам. Вше кед ме видзи, барз ми ше радує. Випатра же мой Медо нє люби мачки, понеже вше кед их видзи, виплаши их зоз двора. Часто зоз Медом бавим и фодбал.

         Я мойого Меду любим прето же ме вше слуха. Вше ше обрадує кед придзем дому зоз школи.

Катарина Бесерминї, III, Коцур

МОЯ ДРАЖКА ДО НЄБА – ЦО МЕ ПОДЗВИГУЄ ПО ХМАРИ

            З дня на дзень, з рока на рок, поставам старша, одроснутша и вше самостойнєйша.

            Першираз кед ше требало оддвоїц од родичох и фамелиї, нє бала сом ше. Пошли зме з учительку у штвартей класи до школи у природи на Ґучево. Шицко було добре, алє сом почувствовала страх кед зме ше цала класа похорели. Учителька нас одшмельовала и благала же зме нє сами гоч зме шицки без родичох тоти даскельо днї. Други раз сом пошла на камп атлетики на Златар. Учительки и пайташох з моєй класи нє було, алє бул зо мну мой брат Теодор. Вон нє мал таки благи слова, алє цали дзень бул зо мну. Тераз шлїдзи и камп до Швайцарскей на штернац днї, дзе нє будзе анї учительки, анї брата. То вельке виволанє за мнє прето же треба пойсц до иножемства на дакус вецей днї, алє источашнє ше барз радуєм, бо ше сцем зочиц зоз страхом и превозисц го.

            То будзе дражка по хторей сцем крачац шмело, зоз подзвигнуту главу и ошмихом на твари.

Адрияна Штранґар, VII, Руски Керестур