КОЦУР – Културна манфестация „Коцурска жатва” и стретнуце младих того року будзе отримана шлїдуюцого викенду, 10. и 11. юлия.
Програма тогорочней дводньовей манифестациї почнє на пияток, 10. юлия на 10 годзин у просторийох Етно клуба „Одняте од забуца” зоз роботню за дзеци. Истого дня на 19 годзин у валалскей Библиотеки „Данило Киш” будзе отримана промоция рускей Википедиї.
Други дзень Културней манифестациї „Коцурска жатва” и стретнуце младих почнє зоз Спортскима бависками „Яша Баков” на 8:30 годзин у Основней школи „Братство єдинство”.
Пополадню того дня, на 17 годзин, будзе традицийне придаванє хлєба, як и дзецинска програма у Доме култури. На площи опрез Дома култури на 18 годзин будзе отверанє етно столох.
Од 18:30 годзин у просторийох валалскей Библиотеки будзе отримана вистава зоз котру буду представени 80 роки иснованя Активу женох. На 19:30 годзин почнє централна преслава Културней манифестациї, святочни концерт, у Велькей сали Дома култури.
По законченю святочней програми, од 22 годзин, будзе отримана остатня часц тогорочней Културней манифестациї и стретнуца младих – „Жатва за младих” у клубу „Оаза”.
Тогорочну Културну манифестацию „Коцурска жатва” и стретнуце младих потримали Национални совит Руснацох, Роботне цело за младих Националного совиту Руснацох, Завод за културу войводянски Руснацох, Општина Вербас, Туристична орґанизация општини Вербас, Културни центер Вербас, Министерство державней управи и локалней самоуправи, Покраїнски секретарият за културу, явне информованє, одношеня з вирскима заєднїцами, Покраїнски секретарият за образованє, предписаня, управу и национални меншини – национални заєднїци.