РУСКИ КЕРЕСТУР/НОВИ САД – Вирни зоз Гуменого у Восточней Словацкей од соботи 4. юлия, та по стреду 8. юлия пребуваю у Руским Кересуре дзе су змесцени у Доме школярох у керестурскей школи. На тей екскурзиї на початку нащивели Бунарич, при Паличу, дзе парох Церкви Вознесенє Пречистей Дїви Мариї зоз Бикова влч. Доминик Ралбовски вєдно зоз деканом прешовским и парохом зоз Гуменого о. Мирослав Илько служел Службу Божу.
Нєдзельову Службу Божу у керестурскей Церви св. о. Миколая предводзел декан прешовски и парох зоз Гуменого о. Мирослав Илько, а з нїм служел парох керестурски о. Владислав Варґа и о. Владимир Медєши. На служби були присутни и госци, грекокатолїцки паломнїки зоз Гуменого. То уж штварта їх нащива Рускому Керестуру и нашим парохийом.
Пондзелок, 6. юлия госци зоз Гуменого нащивели Церкву св. апостолох Петра и Павла у Новим Садзе дзе их дочекал парох о. мр Дарко Рац. Була то нагода и же би видзели центер Нового Саду и Петроварадинску твердиню.
Вовторок, 7. юлия госци цали дзень препровадза у Водици дзе на 11 годин будзе Служба Божа, а церковни одборнїки им порихтаю того дня полудзенок и друженє понеже приятельство медзи вирнима зоз тих местох тирва оддавна.
