КИКИНДА – Тогорочна 41. манифестация „Днї лудаї” у Кикинди почала вчера, 17. септембра, и будзе тирвац по нєдзелю, 20. септембер.
Манифестация промовує шицки туристични, алє и привредни и културни потенцияли городу у котрим ше отримує, як и вредносци сивернобанатского стредку нє лєм у Сербиї, алє и у иножемстве.
През штири днї тирваня манифестациї буду отримани числени подїї. Нащивителє годни уживац у програми културно-уметнїцких дружтвох, у Банатским фруштуку дзе годни покоштовац традицийни єдла того краю, у Европским куцику дзе буду промововани етно и туристични змисти, у бавискох з лудаю и иншим.
Тиж, годни прешейтац през улїчку старих ремеслох и сувенирох, а каждого вечара под час манифестациї буду отримани и наступи познатих шпивачох на городскей площи.
Централна подїя самей манифестациї то меранє найчежшей и найдлугшей лудаї. Од 2022. року Кикинда часц Шветовей асоцияциї Great Pumpkin commonwealth.
Минифестацию нащивює вецей дзешатки тисячи госцох зоз жеми и иножемства, а орґанизаторе поволали шицких же би голєм єден дзень тирваня манифестациї нащивели тоти краї и уживали у интересантней програми котру порихтали.