ЖАБЕЛЬ – Туристична орґанизация Општини Жабель у викенду пред нами орґанизує „Beer fest”. Орґанизаторе наявели два днї добрей забави, музики и друженя.
На жабельским Beer festu нащивителє годни покоштовац розлични домашнї пива, и традицийних, алє и експериментални, годни ше упознац зоз процесом продукциї и бешедовац зоз продукователями, цо и циль того фестивалу.
Попри деґустациї, фестивал понука и забавни змисти, односно музичну програму у котрей за два вечари наступя три бедни и єдна шпивачка. На соботу, 19. септембра будзе шпивац Амадеус бенд, а пред нїм бенд Madona trinute. Док на нєдзелю 20. септембра наступи шпивачка Ивана Селаков, а пред ню бенд Отказни рок.
Програма обидва днї почнє на 18 годзин, концерти на 20 годзин, а Амадеус бенд и Ивана Селаков буду наступац на 22 годзин.
Програма фестивалу пива будзе у центре, у парку Присоєдинєня, односно у парку при пияцу. Уход ше нє наплацує.