И того року успишни „Ловарски бал” у Коцуре

автор Ол. Русковски
116 Опатрене

КОЦУРЕ – И того року Ловарске дружтво „Сокол” зоз Коцура всоботу, 11. януара орґанизовало „Ловарски бал” котри бул отримани у Пелетовей сали.

Того вечара ше баловало вецей як 200 госцох, як зоз Коцура, так и зоз других околних местох – зоз Савиного Села, Змаєва, Вербасу, Руского Керестура, Дюрдьова, Нового Саду. Окрем госцох зoз околїска, и члени вецей валалских здруженьох и Културно-уметнїцких дружтвох пришли потримац ловарох и розвешелїц ше у красней атмосфери.

Предсидатель Ловарского дружтва „Сокол” Любомир Тамаш зоз пригоднима словами привитал госцох и пождал им приємни вечар и же би ше ище велї роки так баловали.

Орґанизаторе за тот вечар, окрем смачней, правей ловарскей вечери, пририхтали и богату томболу. Вредни и интересантни дарунки обезпечело Ловарске дружтво, а томболи даровали и числени спонзоре. Главна награда, бициґла, пошла до Нового Саду, а томболу нєсподзиваня котру обезпечели „Коцурски бетяре” достали госци зоз Вербасу.

И того вечара за добре розположенє и забаву госцох були задлужени „Коцурски бетяре”, а весела атмосфера, шпиванка и танєц тирвали до позних годзинох и були знак ище єдного успишного коцурского „Ловарского балу”.

ПОВЯЗАНИ ТЕКСТИ