КОЦУР – На закончуюцей манифестациї „Днї информатики у школох Войводини”, Основна школа „Братство єдинство” зоз Коцура достала главну награду за доприношенє унапредзованю квалитету и диґитализациї настави.
Коцурска школа достала плакету „Проф. др Ст’єпан Хан” котра представя коруну закладаня управи школи, наставнїкох и школярох у осучасньованю и диґитализациї наставного процесу. Учителька руского оддзелєня першей класи Славица Чельовски и наставнїца анґлийского язика Здравка Майкич наградзени за виробок образовних софтверох у настави и то нє першираз же ше занятих у тей школи визначує зоз иновативносцу у роботи.
По словох директорки Основней школи у Коцуре Сенки Мученски, думаня є же награда котру достали цалком заслужена. То вельке припознанє, як гварела, з оглядом же то найвекша награда котру єдна установа може достац. Одноши ше на окреме вельке доприношенє диґитализациї настави, на технїчну опременосц школи, интерактивни табли и шицки диґитални алати хтори ше хаснує у настави, алє и на вельку анґажованосц наставнїкох у хаснованю опреми и унапредзованю квалитету настави.
Манифестация „Днї информатики у школох Войводини” традицийно отримана 18. раз под покровительством Покраїнского секретарияту за образованє, предписаня, управу и национални меншини – национални заєднїци, Факултету за економию и инжинєрски менаджмент и Центру за науково и технолоґийни виглєдованя.
