НОВИ САД – Меланиї Римар, длугорочней редакторки нашого часописа за дзеци „Заградка” хтора однєдавна у пензиї, на шветочносци Дружтва новинарох Войводини (ДНВ), вчера уручене „Златне пирко”, найвисше рочне припознанє того здруженя медийних роботнїкох.
Припознанє и грамоту „Златне пирко” ДНВ додзелює за окремни новинарски досяги и доприношенє вкупному розвою и унапредзеню новинарства. На шветочносци хтора отримана у будинку Радио-телевизиї Войводини на Мишелуку з тей нагоди уручени пейц „Златни пирка” за 2022. рок, а медзи лауреатами попри Меланиї Римар, як єдиней з меншинских медийох, и редактор Документарней програми Радио Беоґраду 2 Драґослав Симич, режисер и новинар РТВ Горан Вукчевич, комуниколоґ и науковец-виглєдовач з обласци медийней теориї и пракси проф. др Биляна Раткович Нєґован, як и ветеран „Сримских новинох” Йован Вукович хтори у новинарстве од 1956. року, а и нєшка, у своїм 86. року, и далєй пише и обявює.
На шветочносци припознанє уручене и новинарки Радио-телевизиї Сербиї Ясмини Никитович, авторки емисиї „Знанє-иманє” хтора єдна з лауреатох „Златного пирка” за 2021. рок.
Гоч су з рижнородних медийох – телевизиї, радия, преси, тих з националну фреквенцию, меншинских лєбо локалного характеру, шицким лауреатом заєднїцке же тей професиї дали цали роботни вик и витворели тирваце дїло хторе понад каждодньового окончованя роботних задаткох. Як визначел предсидатель ДНВ Петар Кочич, прето додзельованє „Златного пирка” нє лєм припознанє од колеґох колеґом, алє и мотив и приклад шлїдуюцей ґенерациї новинарох як професийно и достоїнствено крачац по тей драги.
