КОЦУР – У просторийох Дому култури у Коцуре 31. януара отримана схадзка Управного одбору Рускей матки и редакциї гласнїка Рускей матки Руснак.
По прилапйованю дньового шора и записнїка зоз предходней схадзки, почала схадзка на котрей ше дискутовало о 12 точкох.
По словох предсидателя Рускей матки проф. др Михайла Фейси, порушани теми котри углавним окремни точки на Скупштини, а проєкти найзначнєйши.
Славица Чельовски анализовала прешлорочну дїялносц Месного одбору Коцур и плани за чечуци рок, а бешедоване и о колективней подобовей вистави котра ма буц отримана у Културним центру Войводини Милош Црнянски, пар днї пред отвераньом Конґреса у Парламенту Румуниї.


Друга значна ствар то правенє делеґациї за тот одход, а бешедоване и о означованю Дня св. Трифуна и св. Валентина котре плановане за 14. фебруар у Библиотеки у Коцуре.
На схадзки, попри стандардних активносцох Рускей матки, дискутоване и о двох нових проєктох котри би мали буц реализовани того року. Слово о документарним филму котри Руска матка перши раз прави же би участвовала на фестивалу русинского документарного филма Кед голубица лєцела у Петровцох и Старих Янковцох, а на поетским плану, видавательству, як гварел др Фейса, маю медзинародне сотруднїцтво и музични активносци, а Владимирови Малацкови помогли же би обявел свой цд.
Шицки предкладаня о котрих ше дискутовало на схадзки буду ше потвердзовац и прилапйовац на Скупштини котра будзе отримана концом фебруара.
