КОЦУР – На соботу 7. фебруара на площи опрез Основней школи „Братство єдинство” у Коцуре будзе отримана пията манифестация „Капушнїк фест” у орґанизациї Туристичней орґанизациї општини Вербас.
За тот дзень орґанизаторе пририхтали рижнородну и богату програму, а на 14 годзин заказане святочне отверанє манифестациї.
Нащивителє годни уживац у музики тамбурового оркестра, наймладшим орґанизаторе пририхтали друженє зоз аниматорами, а ту и нєзаобиходне безплатне коштованє капушнїкох характеристичних за тот валал.
Орґанизаторе поволали валалчанох и шицких других заинтересованих же би ше 7. фебруара пополадню прешейтали през центер Коцура и уживали у програми пририхтаней у рамикох манифестациї.