У новембру означуєме рок як спадла стреха и як почали блокади на факултетох, а шицко тото порушали млади.

Нєщесце котре ше случело у Новим Садзе 1. новембра 2024. року, на 11 годзин и 52 минути охабело вельки упечаток на нашу заєднїцу и на цалу державу. Страдали 16 особи, а ми и нєшка паметаме їх мена.

Тото случованє порушало вельочислени протести у Сербиї и барз вельки реакциї народу. Новосадски студенти станули и почали вимагац одвити од власци. Факултети були блокирани такой у новембру, а студенти мали пейц вимоги од власци. Велї гражданє обтужели власц за тото нєщесце, а през час ше дознало и за велї други инциденти котри повязани зоз власцу и корупцию.

Студенти вимагали:

1.      же би ше обявело документацию о реконструкциї Гайзибанскей станїци на котрей спадла стреха;

2.      же би ше идентификовало гражданох котри нападали студентох и професорох;

3.      же би ше одбило виновни прияви студентох котри були загарештовани на протестох;

4.      звекшац буджет за високе образованє;

5.      детально виглєдац же би ше утвердзело шицки обставини котри ше случели на вельким на протесту у Беоґрадзе, 15. марца, кед якиш нєобични звук знємирел людзох.

Вони познєйше додали ище два вимоги:

6.      вимогу за одвичательносц и защиту пациєнта;

7.      розпущованє Народней скупштини и розписованє позарядових парламентарних виберанкох.

Студентски и граждански протести ше почало орґанизовац по цалей держави.

Руски Керестур

Перши протест бул 24. януара кед нєнаявено отримани 15 минути цихосци у центру валала, а потим ше на нїх зявйовало вше векше число гражданох. Пошвидко зме направели профили на дружтвених мрежох под назву Керестур Млади, прейґ хторих зме обвисцовали народ о каждим шлїдуюцим протесту.

Єден з перших векших протестох котри зме отримали бул 13. фебруара, на котрим бешедовал доц. др Александер Мудри, а школяре одшпивали два музични точки. На тим протесту зме по першираз мали и мерковачох у лайбикох и теди зме подумали же насправди можеме цошка посцигнуц зоз тим. Тото случованє пребудзело цошка нове у валалє и одшмелєло гражданох же би пришли потримац. Орґанизовали зме тиж и даскельо протести за потримовку професором котри застановели наставу, над котрима ше окончовало прицисок, же би знали же су у тим нє сами и же маю нас, гражданох и младих зоз Керестура. Познєйше ше сходи у центру валала претаргло пре безпечносц гражданох после двох инцидентох, а тиж и пре польопривреднїкох котри потримовали протести од самого початку, алє зме на дружтвених мрежох ище вше активни.

Дюрдьов

Перши менши сходи гражданох у општини Жабель були орґанизовани ище у новембру 2024. року у Дюрдьове. Концом фебруара и на початку марца гражданє орґанизовали протестни шейтаня же би потримали студентох у блокади.

Tреце протестне шейтанє було 8. марца у општини Жабель, кед до Дюрдьова пешо пришли гражданє зоз шицких местох општини –Жаблю, Чуроґу, Дюрдьова и Ґосподїнцох, як и гражданє зоз Темерину, Мошорину, Шайкашу, Вилова, Будисави, Качу и Ковилю. Дюрдьовчанє того року орґанизовали и вецей Збори гражданох, на хторих ше бешедовало о найвекших проблемох зоз хторима ше валалчанє зочую. Як найвекши проблеми визначене же нєт достаточно места у валалскей оводи, а тиж и же нєт яшелька у валалє. Тиж, на Зборох порушана инициятива же би ше зачувало здрави древа у паркох у валалє.

Велї валалчанє участвовали на протестох хтори були орґанизовани у општини, алє и у других местох у держави.

Дюрдьовчанє орґанизовали и вецей акциї збераня донацийох за студентох у блокади.

Коцур

Студентски протести у Сербиї пре траґедию на Гайзибанскей станїци у Новим Садзе тирваю уж вецей як рок, а окрем младих зоз цалей держави, численим протестним сходом, блокадом, протестним шейтаньом нєпреривну потримовку даваю и млади зоз Коцура. Вецей протестни сходи були орґанизовани у Коцуре, як и акциї Застань Сербийо кед ше застановйовало транспорт у центру валала, протестни шейтаня, а тиж и вельки протест котри млади у валалє орґанизовали кед их на бициґлох пришли потримац и млади з Руского Керестура, Кули, Савиного Цела, Деспотова, Вербасу, Змаєва и других местох. Остатнї мешаци подобни акциї у Коцуре нє орґанизовани, алє числених младих Коцурцох мож видзиц на порядних протестох у Вербаше и у Савиним Селу каждей нєдзелї, як и на вельочислених протестних сходох у Новим Садзе.

Шид

У Шиду були орґанизовани даскельо шейтаня и протести опрез просторийох владаюцей партиї. На протестох було од 15, та по 200 людзох. Шейтаня були, углавним, орґанизовани по просториї СНС партиї, ґимназию, општину, лєбо суд. Велї гражданє думаю же людзе уценєни, кед слово о роботи, пенєжу и одказу, и гоч ше нє складаю зоз политику, нє можу реаґовац. Велї з Шиду 1. новембра присуствовали на комеморциї з нагоди наполньованя рока од траґедиї на Гайзибанскей станїци.

*

На самим початку нам бул циль потримац студентох, подзвигнуц свидомосц у валалє и виражиц нєзадовольство котре уж роками у цихосци панує у нашим месце.

То зме успишно поробели, а тераз плануєме предлужиц нашо активносци и после 1. новембра.

Шицки котри нам помагали у орґанизациї и зоз донациями нам постали вирни товарише, та можеме повесц и же зме направели и емоцийни успихи у тим шицким. После протестох зме зрозумели же борба нє єдно случованє, алє процес. Тераз вимагаме, попри потримовки студентох, и пременки у нашим валалє. Жадаме же би ше наш глас чуло и кед нєт протести, у школох, медийох и у цалим валалє.

1.11.2025. обновел тоту енерґию. 

.

У писаню тексту участвовали и: Лидия Сарич, Оля Русковски и Александра Бучко