ДЮРДЬОВ – Преподаванє и представянє нашеньскей хижи KWS и хемийней хижи BASF було стреду, 21. януара у СУР Пицерия Трле МНА.
О седем сортох нашеня кукурици зоз розличнима FAO вредносцами, їх предносцами и вигодносцами спред нашеньскей хижи KWS приповедал дипломовани инжинєр польопривреди Боян Шулян з Нового Саду. За садзенє и пестованє, кед слово о Южней Бачки як окремно вигодни сорти кукурици видвоєл Hypolito FAO ґрупи 390, Donjuan FAО ґрупа 440 и Giro FAO ґрупа 480. Вон гварел и же уж тераз мож заключиц же 2026. року будзе мєнєй посадзеней кукурици понеже єст вельо нашато жита, олєйовей циклочки и ярцу.
Инжинєр Шулян толковал и о двох сортох слунечнїку, а после того одвитовал на питаня гражданом котри глєдали совити, алє и же би им ше розтолковалковали факти прецо даєдна сорта вигодна за одредзену жем, яки широки треба же би були шори и кукрици и слунечнїку, алє и кельо заренка ше препоручує за шаце на одредзеней поверхносци.
На концу преподаваня присутним гварене же можу задармо превжац апликацию MyKWS котра представена як диґитални помоцнїк з котрим мож превериц стан жеми на парцели, як и котра рошлїна вигодна за пестованє пре состав жеми и подобне.
О продуктох хемийней хижи BASF и защити урожаю з їх продуктами бешедовал дипломовани инжинєр защити рошлїнох Драґан Познан з Нового Саду. Вон визначел же барз важне добре оценїц кеди треба першираз пирскац житарки, понеже воно часто може буц достаточне кед є окончене у вигодним периодзе. На преподаваню видвоєл два нови фунґициди Mizona котри ше хаснує у першим третману процив хоротох и Navura котре видвоєл як револуционерне ришенє кед слово о защити класкох.
Преподаванє орґанизовал Аґро Михайловски ДОО зоз Дюрдьова. Шлїдуюце преподаванє у їх орґанизациї будзе нєшка, штварток, 22. януара на 11 годзин, тиж у СУР Пицерия Трле МНА у Дюрдьове. Представена будзе нашеньска хижа Syngenta и хемийна хижа ADAMA.
