БЕОҐРАД – Закончело ше 37. Европске першенство у ватерполу, хторе тирвало од 10. по 25. януар у Беоґраду, репрезентация Сербиї освоєла златну медалю.
Европске першенство ше отримує кажди два роки под защиту Европскей акватики (European Aquatics), а тото виданє означує сторочнїцу отримованя Европского першенства у ватерполу.
Резпрезентация Сербиї у першей фази бавеня по ґрупох закончела як перша у ґрупи, у другей фази бавеня по ґрупох мала исто боди як и репрезентация Мадярскей, алє була лєпша у медзисобним змаганю, та закончела тиж на першим месце и пласовала ше до полуфинала.
У полуфиналу ватерполисти Сербиї победзели репрезентацию Италиї, и заказали финалне стретнуце зоз найвекшим ривалом Мадярску. Одличне бависко у финалу и побида над репрезентацию Мадярскей зоз резултатом 10:7, одлучело же „делфини” постали Европски шампиони по дзевяти раз у историї. Остатнїраз репрезентация Сербиї була шампион пред осем роками у Шпаниї.
За найлєпшого бавяча (MVP) Европского першенства у Беоґраду преглашени репрезентативец Сербиї Душан Мандич, а у найлєпшим тиму першенства вибрани ище двоме нашо репрезентативци, Страхиня Рашович и ґолман Милан Ґлушац.
Турнир служи як квалификацийне змаганє за Шветове першенство у водових спортох 2027. року, хторе будзе у Будимпешти у Мадярскей и за Европске першенство 2028. року у Чарней Гори.