РУСКИ КЕРЕСТУР – Пре нєщесце хторе ше случело вноци медзи стреду и штвартком прешлого тижня у Руским Керестуре, кед фамелиї Планчак згорело закрице на хижи, тих дньох порушана Гуманитарна акция.
Акция порушана зоз цильом же би ше купело материял за нове закрице и цо скорей Планчаковим оправело хижу.
Тих дньох волонтере з валалу розчисцели плочу на хижи, поставена и древена конструкция за закрице, а вчера сцигнул и плех, та ше закривало хижу.
Вкупни трошки за нове закрице буду коло 600.000 динари, затераз назберане 300.000, та хиби назберац ище за другу половку.
– Нашли зме спонзорох хтори даю 300.000 динари. Єдну часц пенєжох достанєме од Општини, прейґ Социялного, хтори нам уплаца 100.000 динари, а 200.000 динари достанєме од двох спонзорох. У тей хвильки маме средства за пол закрица, 300.000 динари, та глєдаме помоц и од валалчаньох же би помогли назберац ище 300.000 динари – гварел з тей нагоди єден од орґанизаторох акциї, секретар Месней заєднїци, Михайло Пашо.
Шкатули за добродзечни прилоги поставени на шлїдуюцих локацийох – у предавальньох „Тренд би” (при Новим Населєню и у улїци Ю.Н.А.), у предавальнї „Фреш маркет”, „Виславски делови М”, „Транспортни центер Ковач” и у задруґи „Керестурска паприґа”, а понеже материял за закрице напредок обезпечело керестурске подприємство „Хела”, донациї мож однєсц и там.
