НАШО МЕСТА – По традициї на швето Обрезания Исуса Христа и Василия Велького, односно на Нови рок у церквох священїки сообщую вирним статистични податки за прешли рок.
У нашей найвекшей парохиї св. о. Миколая дзе и шедзиско нашей Епархиї статистични податки з матрикулох на новорочней Служби Божей сообщел парох о. Владислав Варґа. Покресцени – 36 (3 особи старши и нє з Керестура, а даскельо з иножемства), винчани 11 пари, а поховани 65 особи, а од нїх Св. тайну Олїва пред шмерцу прияли 32 особи. Найстарша похована парохиянка мала 96 роки, а найстарши парохиян мал 94 роки. Руковину 2025. року плацели 678 обисца, 32 менєй як 2024. року, а опадованє плаценя руковини тирва од 2019 року.
У новосадскей парохиї святих апостолох Петра и Павла на пол рока, точнєйше у юлию прешлого 2025. року пришол нови парох о. Дарко Рац. По нашлїдзеней статистики за перши пол рока и по статистики хтору нови парох призначовал: покресцени 4 особи, двойо дзеци у першим року живота и двойо старши по седем роки живота, повинчани 4 пари, а у шицких парох лєм єдно з млодятох було грекокатолїцкей вири, поховани 27 особи.
По податкох зоз парохийних матрикулох у грекокатолїцкей парохиї Успения Пресвятей Богородици у Коцуре за 2025. рок зазначене же: покресцени 24 особи, повинчани 10 пари и поховани 35 особи. Поховани 18 хлопи и 17 жени, найстарши од хлопох котри умар то Яков Орос (88 роки), а найстарша од женох Надица Сендерак, нар. Уйфалуши (94 роки). Концом прешлого року грекокатолїцка парохия Успения Пресвятей Богородици у Коцуре мала коло 2200 парохиянох.
У парохиї Рождества Пресвятей Богородици у Дюрдьове єст коло 800 парохиянох. Покресцени аж 23 особи, цо позарядово вельо, кед ше поровна з остатнїма даскельома децениями, з того 11 дзивчата и 12 хлапци, од того штири полнолїтни особи. Повинчани 3 пари, а поховани 12 особи, 5 жени и 7 хлопи, два особи нє зоз Дюрдьова. Руковину за 2025. рок плацели 164 обисца, за 2024. рок 178 обисца, 2023. року 196 обисца, док за 2022. рок руковину плацели 202 обисца.
У парохиї св. архангела Михаїла у Ґосподїнцох у 2025. року покресцене єдно дзивче, винчаня нє було, а умарла єдна жена.
По податкох зоз парохийних матрикулох парохиї Покрова Пресвятей Богородици у Старим Вербаше за 2025. рок зазначена статистика по котрей: покресцени 2 особи, повинчана 1 пара и поховани 12 особи. Парох о. Алексий Гудак визначел же дас 3 роки нє було винчаних, а 2025. року повинчал єдну пару и же у парохиї єст коло 630 парохиянох.
У податкох з парохийних матрикулох Грекокатолїцкей церкви святого Владимира у Новим Вербаше за 2025. рок зазначена статистика по котрей нє було покресцени особи, як анї повинчани пари, а поховани 4 особи. По словох пароха нововербаского о. Данила Задрепка, пошвеца ше 131 обисце и коло 330 парохиянох.
У грекокатолїцкей парохиї у Суботици, котру тиж водзи о. Задрепко, у предходним року нє було покресцених, анї повинчаних, як анї похованих. Парох о. Данил Задрепко гварел же у Суботици менша заєднїца, єст коло 20 обисца, од 40 до 50 парохиянох.
У Церкви Преображеня Господнього парох о. Михайло Режак визначел же 2025. року стан у церковних матрикулох таки: покресцени 3 особи, поховани 13, а повинчана 1 малженска пара. О. Режак гварел же, нажаль, з рока на рок винчаня и кресценя лєдво же и єст, або анї нєт, а число хованьох бриґує. Окреме визначел же єст младих грекокатолїкох хтори, нажаль, нє вибераю свою грекокатолїцку церкву за винчанє и кресценє, алє даєдну другу. Обачлїво зменшане и пошвецанє обисцох, 2025. року пошвецени 84 обисца, а пред даскельома роками и вецей як 100.
Парох Церкви Собору святого архангела Михаила у Беркасове о. Владимир Еделински Миколка, визначел же 2025. року нє було анї повинчаних, анї покресцених, а два особи поховани. Тиж у Филияли у Бикичу у Церкви Успения Пресвятей Богородици влонї нє було винчаних, було єдно кресценє, а два особи поховани.
Подобни стан и у Церкви и парохиї святого апостола и евангелисти Луки у Бачинцох. Парох о. Юлиян Рац гварел же 2025. року нє було повинчаних анї покресцених, а три особи поховани.
Парох сримскомитровицкей церкви о. Иґор Вовк визначел же 2025. року у тей парохиї умарли 22 парохиянє, покресцени 6, а повинчана 1 пара. Руковину плаци лєм половка вирних.
Єромонах о. Мирослав Платон Салак, священїк у кулскей Церкви св. свящ. Йосафата, визначел же статистика зоз церковних матрикулох у 2025. бриґує. Умарли 32 особи, повинчани 3 пари, а покресцени 2 особи. Руковину парохиянє плаца кед ше пошвеца обисца.
