НОВЕ ОРАХОВО – На дзень преслави Националного швета Руснацох, у Новим Орахове, у Завичайней хижи, Руска матка (РМ) отримала схадзку свойого Управного одбору.
По дньовим шоре, медзи иншим, найвецей бешедоване о снованю Месного одбора РМ у Новим Орахове и о реализациї проєкту Стретнуца младих Руснацох у Новим Орахове.
Так, у рамикох трецей и штвартей точки Дньового шору основани Месни одбор РМ Нове Орахово и виложени проєкт Форума Младих Рускей матки – Стретнуце рускей младежи 2026. року у Новим Орахове.
Члени и снователє – Срдян Ґовля (предсидатель), Дарко Заґорац (заменїк), Саша Чордаш, Урош Славчев, Кристиян Колошняї и Валентин Кишюгас. Срдян Ґовля источасно и представитель Форума младих Руснацох Сербиї у Шветовим форуму русинскей/рускей/лемковскей младежи.
Проєкт „Стретнуца младих припаднїцох/припаднїкох рускей заєднїци у Новим Орахове” представел його ношитель Дарко Заґорац. Стретнуца би ше мали отримац у трох дньох авґуста, а програма зоз численима подпрограмами прилапена єдногласно.
По штвартей точки Дньового шору, предсидатель НСРНМ мср Стеван Самочета поволал младих же би направели и Финансийни план Стретнуцох и же би з нїм конкуровали на шицки конкурси хтори у 2026. року буду мац дотикаюци точки зоз гоч хтору часцу їх вкупней програми.