РУСКИ КЕРЕСТУР – Пияток, 22. децембра у спортскей гали у Руским Керестуре закончел ше перши Жимски турнир у малим фодбалу.
Закончуюци вечар турнира отворели екипи зоз стретнуцом за треце место – Дослов Компани зоз Суботици, котра у полуфиналним стретнуцу була надбавена од екипи НТМ Чикерия зоз Вербасу зоз резултатом 6:3 и екипа Ґоц Дуо зоз Червинки, котра у полуфиналним стретнуцу прецерпелa пораженє од екипи Фурни ентериєри зоз Вербасу зоз резултатом 3:0.
Стретнуце за треце место було ефикасне, було то квалитетне бависко обидвох екипох, а посцигнути аж 12 ґоли. Резултат на концу бул 7:5 за Дослов Компани, та так Суботичанє освоєли треце место и достали награду од 20 тисячи динари. Млада екипа Ґоц Дуо зоз Червинки ше добре указала на тим стретнуцу, медзитим щесце и искуство були на боку екипи зоз Суботици. Екипа Ґоц Дуо зоз Червинки завжала штварте место, а за награду достала безплатне участвованє на турниру 2024. року.
Кед ше закончело стретнуце за треце место, шлїдзело вельке финале дзе ше стретли обидва екипи з Вербасу. НТМ Чикерия процив Фурни ентериєри, дзе у єдним квалитетним и достойним стретнуцу финала, побиду однєсла екипа НТМ Чикерия зоз резултатом 2:0. Екипа НТМ Чикерия ше през цали турнир указала як екипа хтора ма шицко же би подзвигла погар за найлєпшу екипу першого Жимского турнира у малим фодбалу у Руским Керестуре. Ґоли у финалним стретнуцу дали Новакович и Муминович.
Побиднїцкей екипи НТМ Чикерия зоз Вербасу припадла награда од 150 тисячи динари, док другопласованей екипи Фурни ентериєри, тиж зоз Вербасу припадла награда од 50 тисячи динари.
После финалного стретнуца були додзелєни награди за найлєпшого бавяча, ґолмана и ґолґетера турнира. За найлєпшого бавяча турнира преглашени Марко Новакович зоз побиднїцкей екипи НТМ Чикерия зоз Вербасу, за найлєпшого ґолмана преглашени Петар Мароєвич зоз екипи Фурни ентериєри зоз Вербасу, а за найлєпшого ґолґетера преглашени Александар Золнаїч зоз екипи Дослов Компани зоз Суботици.
