КУЛА – У Основней школи „Иса Баїч” отримане Општинске змаганє у шаху на котрим участвовали и школяре зоз Основней и штреднєй школи зоз домом школярох „Петро Кузмяк” зоз Руского Керестура.
На Општинским змаганю, котре отримане концом фебруара, участвовали дзевецеро школяре зоз керестурскей школи: Теодор Штранґар, Алекса Шомодї, Теодор Гарвильчак, Лука Фа, Андрей Провчи, Тони Орос, Николина Гарди, Валентина Гарди и Лана Шомодї.
Пласман на Окружне змаганє виборели шесцеро школяре, и у дзивчатскей конкуренциї: Николина Гарди зоз 5. класи, Валентина Гарди зоз 7. класи и Лана Шомодї зоз 8. класи, а шицки три школярки завжали перши места.
При хлапцох пласман виборели Лука Фа зоз 8. класи котри завжал 2. место, а школяре Андрей Провчи и Тони Орос виборели директни пласман на Окружне змаганє понеже прешлого року участвовали на Републичним змаганю.
Окружне змаганє будзе отримане на соботу, 9. марца у ОШ „Петефи Бриґадох” у Кули.