РУСКИ КЕРЕСТУР – У шветочней и веселей атмосфери и того року отримани традицийни Майсторски бал, хтори позберал коло 170 госцох зоз рижних местох.
Бал отримани всоботу, 31. януара у ресторану Три коруни у Руским Керестуре, а попри Керестурцох було и надосц госцох зоз Лалитю, Кули, Червинки, Вербасу и других местох.
Як и каждого року, подзелєна и розкошна томбола хтору обезпечели приватни поднїмателє, а векшина наградзених були зоз Керестура.
Од атрактивнєйших наградох були – посцель, покладанє вожацкого испиту за трактор, печене праше, традицийна коцурска сушена шунка, рижни файти меблю як цо столїки, фотелї, табурета и подобне…
Попри двох кругох томболи, присутни ше вешелєли и у интересантним змаганю, у такволаним Рулет танцу, дзе награда була торта.
Ресторан ше остарал за смачну вечеру, а анї єден бал нє може прейсц и без доброго музичного смаку, за хтори того року задлужени бул Керестурски бенд „Касиусˮ.
