КОЦУР – У Грекокатолїцкей церкви Успения Пресвятей Богородици у Коцуре вчера, 19. януара, означене швето Богоявлениє Господнє – Трокралї.
Вельку Службу Божу служел декан бачки и парох коцурски о. Владислав Рац. Як надпомнул у казанї, шицки вирни треба же би ше здогадли подїї кед Йоан Креститель покресцел Исуса у рики Йордан.
Каждого року на швето Богоявления ше пошвеца воду, а пошвецанє зоз ню то знак Божого благослову, же би була на хасен духовному и тїлесному здравю шицким парохияном. Велї вирни зоз коцурскей грекокатолїцкей парохиї принєсли и свойо канчови и фляши з воду котри на концу служби парох о. Рац пошвецел.
Парох о. Рац зоз пошвецену воду пошвецел цалу церкву и шицких присутних вирних, а по законченю Служби парохиянє могли присц и набрац себе води и зоз судзини у котрей є пошвецена и однєсц до своїх домох.
З воду пошвецену на Богоявлениє будзе и традицийне пошвецанє обисцох котре почнє нєшка, 20. януара, и будзе тирвац по конєц мешаца, односно по 30. януар.
