ШИД – Зоз пригодну програму вчера, 17. януара у Руским доме, а у орґанизациї КПД „Дюра Киш“ и Подручней канцелариї Националного совиту Руснацох, означене Националне швето Руснацох.
После виводзеня державней гимни „Боже правде“ и шветочней шпиванки Руснацох „Браца Русини“ у виводзеню Старшей шпивацкей ґрупи КПД „Дюра Киш“, тема преслави було 100 роки информованя на руским язику.
О снованю „Руских новинох“ 1924. року и розвою новинох, виривки читали наставнїца руского язика Наташа Еделински Миколка, член Управи дружтва Мирослав М. Цирба як и школяре, хтори уча руски язик з елементами националней култури як виборни предмет, Йована Петрович, Лука Цирба, Стефан Ркман и Михайло Крстеканич.
Присутних привитал и повинчовал националне швето предсидатель Националного совиту Руснацох Йоаким Рац здогадуюци же ше швето Руснацох означує уж 17 роки и же вира, просвита, култура и язик зачували национални идентитет Руснацох по нєшка.
Старша шпивацка ґрупа одшпшивала венчик руских народних шпиванкох, а означованє швета закончене зоз традицийним коктелом.
Националне швето провадзели спред локалней самоуправи предсидатель СО Шид Тихомир Стаменкович, потим нашо паноцове о. Михайло Режак и о. Владимир Еделински Миколка, почесни член дружтва „Дюра Киш“ др Бранислав Маукович як и госци зоз околних местох.
