РУСКИ КЕРЕСТУР – У Виронаучней сали, у порти Катедралней церкви св. отца Миколая, вчера пред числену публику представена моноґрафия, „Вони дотхли верх фодбалуˮ, автора Йоакима Грубеню.
Моноґрафия видата з нагоди ювилею, 100 рокох од снованя Фодбалского клубу „Русинˮ.
На промоциї о кнїжки бешедовали зоз Филозофского факултету у Новим Садзе проф. др Дюра Гарди, бувши фодбалер и спортски роботнїк зоз Коцура Силвестер Хромиш, бувши фодбалски судия, просвитни роботнїк и привреднїк зоз Кули Жарко Попович, як и автор Йоаким Грубеня, а модератор вечара бул мср Сашо Сабадош.
О значносци тей обсяжней моноґрафиї о Фодбалскому клубу „Русинˮ бешедоване з вецей аспектох, а тото зоз чим ше того вечара зложели шицки присутни то же моноґрафия представя капиталне дїло, важне нє лєм за Руски Керестур и його локални Клуб „Русинˮ, хтори того року преславел 100 роки иснованя, алє и за цалу руску заєднїцу, у хторей ше зоз тоту кнїжку збогацує библиоґрафия историоґрафских творох о Руснацох.
Вечар, зоз даскелїма шпиванками, збогацела и Хлопска шпивацка ґрупа Дома култури Руски Керестур, а после представяня моноґрафиї, ушлїдзело друженє и авторово подписованє прикладнїкох своїм вирним приятельом и колеґом спортистом.
Заинтересовани, кнїжку можу купиц у кнїжкарнї „Линеаˮ у Руским Керестуре.
