ДЮРДЬОВ – Традицийни и 23. Фестивал жридлового шпиваня „Най ше нє забудзе” Културно-уметнїкого дружтва „Тарас Шевеченко” отрима ше на соботу, 22. авґуста у дворе Основней школи „Йован Йованович Змай”.
Члени управного одбору дюрдьовского Дружтва ше поряднє и позарядово сходза на схадзкох, а млади активно участвую и помагаю. Прешлого тижня млади орґанизовали даскельо роботнї на котрих прикрашовали дарунки за шицких учашнїкох на Фестивалу. Вони орґанизовали и пораєнє Рускей школи дзе будзе отворена тематска вистава „Дакеди було…”.
23. Фестивал жридлового шпиваня „Най ше нє забудзе” почнє на 20 годзин, после фестивалскей часци будзе ревиялна часц после котрей будзе преглашенє найлєпшей шпивацкей ґрупи, а додзелї ше и специялну награду за окремне закладанє и напредованє. Члени фахового жирия уруча дарунки победнїцкей ґрупи и ґрупи котра достанє специялну награду, а младши члени дюрдьовского Дружтва на дзень фестивалу учашнїкох наградза зоз дарунками.
Пред фестивалом, на 18 годзин будзе урядово отворена тематска вистава „Дакеди було…” у Рускей школи.