РУСКИ КЕРЕСТУР – Основна и штредня школа зоз Домом школярох Петро Кузмяк, у Руским Керестуре, орґанизує Камп ученя и друженя за школярох осмих класох зоз основних школох з околїска, зоз цильом же би им на интересантни, креативни и практични способ приблїжела образовни програми, школски живот и можлївосци хтори их обчекую после упису до штреднєй школи.
Камп будзе отримани од 20. фебруара од 16 годзин, по 21. фебруар по 16 годзин, а програма облапи едукативни роботнї, тимски и спортски активносци, як и друженя и розвагу. Школяре годни розвиц розлнични схопносци, пренайсц нови интересованя и здобуц нових товаришох.
Роботу кампу буду водзиц искусни наставнїци и педаґоґи школи, участвованє на кампу ше нє наплацує, а шицким учашнїком будзе обезпечене єдзенє и змесценє зоз єдним ноцованьом у Дому школярох.
Заинтересовани школяре ше можу приявиц прейґ онлайн форумлару на тим ЛИНКУ.
Вецей информациї мож достац на числох – 025/703-040 и 025/703-041, як и прейґ нєдавно формованей Вибер заєднїци школи.