КУЛА – Традицийне штварте „Крачунске обегованє на пейц километри” отримане внєдзелю 14. януара у Кули. Обегованє каждого року чишлї вше вецей финишерох и прицагує людзох зоз цалей Сербиї.
Бежало ше на драги у напряме Савиного села и то два раз по два и пол километри, а обегованє закончело коло 130 финишерох, гоч приявених кандидатох було вецей як 140.
Кед слово о хлопскей конкуренциї, найшвидши бул Кристиян Стошич, котри завжал перше место, друге место завжал Срето Крстич, док треце место завжал Дьордє Папич.
У женскей конкуренциї пласман бул шлїдуюци – перше место завжала Сладяна Стаменкович, друга була атлетска надїя „Гайдуку” зоз Кули и вицешампионка Сербиї у кросу Ана Новкович, док треце место завжала Йована Милетич.
На обегованю участвовали финишере зоз Беоґраду, централней Сербиї, Зомбора, Вербасу, Руского Керестура, Сербобрану, Бачкей Тополї, Суботици и ище зоз велїх местох, цо гутори же интересованє за тото обегованє каждого року вше векше.
Треба визначиц же на обегованю у Кули участвовала и репрезентативка Сербиї на штреднїх и длугих драгох Сладяна Стаменкович.
Орґанизатор обегованя у Кули то атлетски клуб „Гайдук Маратон тим”, зоз потримовку вельочислених спонзорох, општини Кула, Supllement store-a, Capriola, You Go и велїх дригих.
