У Керестуре на ютре Ярнї явни тренинґ

автор М. Афич
449 Опатрене

РУСКИ КЕРЕСТУР – На соботу, 29. априла на 14 годзин, будзе отримани Явни ярнї тренинґ на базену у Руским Керестуре. Мото тренинґу „Порушай ше, направ перши крочай… Опредзель ше за здрави живот”, а главни спонзор подїї Месна заєднїца Руски Керестур.

Иницияторка тренинґу Мария Гарди котра водзи тренинґи вежбаня Фитнес вок („Fitness walk”) ґрупи котра активно тренира у Спортскей гали. У тим орґанизацийно потримує Месна заєднїца Руски Керестур, котра и главни спонзор тей спортскей подїї, а потримали ю и други тренере рекреативних ґрупох и дзепоєдних Клубох СД „Русин”.

На Явним тренинґу наступя школяре з Атлетского и Карате клубу „Русин” котрих водза тренере Саня Еделински и Михал Орос одн. Анамария Няради, наступя и учашнїци двох старосних ґрупох „Рекреациї за жени” котрих водзи Лїляна Еделински, госци буду и Фетнес ґрупа „Порушай ше” з Нового Саду котру водзи Йована Симич, а ту будзе и ґрупа „Fitness walk” Гардийовей.

Попри тим будзе и мини маратон длужини „Беж за здравє” котри орґанизує Ясна Тасич, а орґанизатор наглашує же учашнїки нє муша пребегнуц цалу длужину, алє спрам своїх можлївосцох, або ше мож и прешейтац.

Здраве костиранє презентує нутриционистка Михаела Милинкович, будзе лимунади за учашнїкох, цо спонзорує кафич Мала оаза, а Явни тренинґ потрима и вецейнїста шветова шампионка у бодибилдинґу Илона Зарубица.

На Явни тренинґ поволани жителє шицких ґенерацийох, та и цали фамелиї, бо активносци будзе за каждого по дацо. Циль Явного тренинґу мотивовац цо вецей особи на гоч яке рушанє котри приноши хасен и за физични и психични живот каждого.

ПОВЯЗАНИ ТЕКСТИ