ВЕРБАС – Од першого зявеня шнїгу, екипи Жимскей служби ЯКП Комуналєц вишли на терен и зоз чежку механїзацию почали розчисцовац драги.
Од чежини шнїгу попукали велї конари котри попадали на драги, дражки, а спричинєли чкоду и на велїх паркираних превозкох. На розчисцованю поламаних конарох и спаднутих древох робели екипи Желєнїдла и Чистоти. По сообщеню, найкритичнейши були улїчки Светозара Марковича, Маршала Тита, Космайска, Народного фронту, Ґустава Крклеца.
Вчера пейц екипи Жимскей служби руцали соль и чисцели драги першого и другого приоритету. З оглядом же шнїг и лядови диждж наявени и за наиходзаци днї, нєпреривне дежурство Жимскей служби у трох сменох ше предлужує.
