НОВИ САД – Терени новосадского Спортского центру „Меридияна” були домашнї турниру у малим фодбалу за ветеранох, а у рамикох Спортских бавискох „Яша Баков”. Участвовали штири екипи, а найлєпши були Ораховчанє.
Внєдзелю, по нєвигодней дижджовней хвилї, на теренох СЦ „Меридияна” у Новим Саду отримани турнири у малим фодбалу за ветеранох. Участвовали штири екипи зоз: Коцура, Нового Орахова и два домашнї Руски културни центер 1 и Руски културни центер 2.
На тот завод нє бавело ше по системи „кажде з каждим” алє лєм полуфинални стретнуца и за перше место.
У першим полуфиналним стретнуцу бавели екипи Коцура процив екипи РКЦ 2. Коцур бул за ниянсу лєпши и победзел зоз резултатом 2:1. У другим стретнуцу бавели екипи Нового Орахова процив екипи РКЦ 1, а лєпши були госцински хтори победзели зоз резултатом 3:2.
После одбавеного финалного стретнуца, побиднїк на турнире була екипа зоз Нового Орахова, на другим месце була екипа зоз Коцура, треце место освоєла екипа РКЦ 1 и штварте екипа РКЦ 2.
Финасийни проблеми у хторих ше нашло Здруженє спортских бавискох „Яша Баков” очиглядни. Турнири ше отримує кед ше винайдзе ришенє за спонзорство и другу помоц. Но, треба припознац же вирни спортисти ище вше нє траца надїю же приду лєпши часи кед слово о финасийох. Дзеки, як видно, єст.