НОВИ САД – Майске число часописа Заградка, окрем порядних рубрикох читачом дарує и дружтвене бависко инспироване зоз Дурнїлом, видуману особу зоз кнїжки „Воденїчка на стриберним потоку”.
У новим задатку у рубрики Пречитали и роздумали треба додац слова хтори хибя у виривку зоз приповедки, а потим шлїдза рубрики Госци и новосци и Сцеме знац и упознац, дзе пише о ище двох представох виведзених на Драмским мемориялу Петра Ризнича Дядї.
У Читальнї мож пречитац приповедку „Як Дурнїло правел колбаси”, а ту и два писньочки у сличкох.
Мала Заградка и тераз пририхтана так же би наймладши могли вифарбйовац, виписовац задати линиї, алє и поопатрац роботи хтори послали.
Ту и рубрики Школяре авторе и Забавни боки, а Радио у Заградки пририхтал барз интересантни лавиринт.
Андрей и Аня Дудашово зоз Руского Керестура упознали нас зоз леминґами Црнком и Белком у рубрики „Мой любимец”, а астрофизичар др Роберт Джуджар нас учи о Млєчней драги и других ґалаксийох.
На остатнїм боку находзи ше Заградкова ґалерия.