СЛАВОМИР ОЛЕЯР народзени 11. юлия 1948. року у Дюрдьове дзе закончел основну школу. Воздухоплївну школу закончел у Кралєве 1966. року. Службовал у Беоґрадзе, Заґребе, Бихачу и Сараєве, а по напущованю воєней служби достал роботу 1971. року у Републичним гидрометеоролоґийним заводзе у Беоґрадзе дзе закончел и Факултет защити на роботи.
Од 1978. року роби у Општини Беочин як инспектор защити на роботи и инспектор за роботни одношеня, а по законченю постдипломских студийох 1985. року у обласци защити животного стредку у Центру за мултидисциплинарни студиї у Беоґрадзе, додате му ище єдно задлуженє, та попри иснуюцих двох, робел єден час и як инспектор за защиту животного стредку. Пре национални и политични причини, мушел напущиц тоту роботу и 1990. року отворел приватну фирму за продукцию канцеларийного материялу хтора успишно робела по 1994 рок.
Концом 1993. року одселєл ше до Торонта у Канади дзе 1997. року закончел студиї информатики и почал робиц у єдней од водзацих канадских банкох як менаджер за информацийни технолоґиї. Розличносц шветових културох зоз хторима ше ту стретал и вигодни материялни обставини, „одомкли” у нїм пре животни обставини поциснуте давне жаданє записовац и описовац рижни судьби и дожица людзох з рижних крайох нашей планети и пробовац найсц у нїх универзалну нїтку, спознац драгу по хторей ше вожиме, гоч и у рижних „автох”.
Пензионовал ше 2010. року и тераз жиє у Торонту у Канади и у Сент Петерсбурґу на Флориди (ЗАД).
Свойо приповедки обявйовал у часопису за литературу, културу и уметносц „Шветлосц” и у Руским християнским календаре.