Сцигол/ла ши до Нового Саду зоз индексом у кишенки и цо тераз? Уселїц ше до студентского дому, лєбо квартелю – уж покончене; пренайсц факултет и мензу – тиж покончене. Прави студентски живот може почац!
ПРЕПОРУЧЕНЯ
Препорученє 1. – Пренайсц дружтво
Знам, ужас. Дакому лєгчейше пренайсц дружтво, а дакому чежше. Дахто ше зоз своїм найлєпшим дружтвом упозна на факултету, а дахто у доме. Зоз людзми ше можеш упознац у даєдней студентскей орґанизациї (опать на сайту факултета яки єст), на секциї, на тренинґу, на роботнї… Кед ши у першим тижню на факултету нє нашол/а нїкого, вер ми, то нє конєц швета. Маш ище вельо часу упознац ше. Пробуй ше опитац дакому чи би сцел пойсц на кафу после преподаваня и увидзиш же одвит будзе позитивни. Май на розуме – шицким вам то перши тидзень на факултету.
Препорученє 2. – Дзе пойсц на кафу?
У кампусу єст даскельо кафичи до хторих мож пойсц медзи преподаванями, а то обачиш на драги по факултет. Препоручим ци даскельо. Мирни места за ученє, або роботу на ґрупним проєкту то кафичи-кнїжкарнї „Зенит” и „Булевар Букс”
(адресу найдзеш на Ґуґлу). Добру кафу можеш тиж так попиц и у Дунайским парку у „Излету”, або дакус далєй у кафетериї „Мала радионица кафе”. Кед сцеш пиц кафу у драже, вец супер кафичи „Фика”, або штанд „Кафица”.
Препорученє 3. – На яки секциї и роботнї ши думала?
Такой ци повем на яки секциї и роботнї сом думала. Сам, лєбо зоз екипу можеш збогациц студентски днї зоз даєдну креативну „обовязку”. Руски културни центер праве место за тото. Можеш ше розпитац кеди проби фолклорней, шпивацкей, хорскей, або драмскей секциї. Верим же там увидзиш дакого познатого зоз свойого места, алє и пренайдзеш нове дружтво. Тиж так и, факултети понукаю свойо секциї за хтори обично приява, або аудиция заказани за новембер, кед прейдзе початни гаос. Кед ше уключиш до даєдней, вец дознаш и цо то „ияди”! Цо ше дотика роботньох, понукнуца вшелїяки, та ци препоручуєм же биш на Инстаґраму нашол/ла профил ”@iz___razz” хтори понука рижнородни креативни роботнї кажду стреду. Кед любиш язики, вец нє препущ „Language club” у Радио кафеу. У предавальнї дружтвених бавискох „Mipl” на поверху можеш бавиц шицки бависка хтори мож и купиц.
Препорученє 4. – Културни збуваня
Запровадз на Инстаґраму „CK13”, „Америцки куцик”, „СКУП” и дознаш же кеди и дзе буду рижни културни змисти. Вистави можеш опатриц, наприклад, у „СУЛУВ-у”, або „Музею сучасней уметносци Войводини”. Кед любиш театер, вец препоручуєм „Новосадски театер” (и представи „Неопланта”, „Било једном у Новом Саду”, „1981”), театер „Промена” (ту можеш одпатриц „Све док говоримо о љубави”, „Три зиме”, „Скакавци”) и „Сербски народни театер” („Последњи Балкански вампир”, „Ко је убио Џенис Џоплин”, „Тартиф”). Треба надпомнуц же скорей културни збуваня у Новим Садзе були вельо численши и же велї програми институцийох и орґанизацийох того року нє достали финансованє. Препоручела бим ци и „Еґзит”, „Фестивал улїчних музикантох” (таки яки дакеди бул), Филмски фестивал „21114” и велї други збуваня, алє их, нажаль, вецей нєт.
Препорученє 5. – Виходи
Нє знам яку музику любиш, алє, на щесце, ноцни живот у Новим Садзе понука за каждого по дацо. Найпознатше место за виходи то Улїца Лазе Телечкоґ. Народна, екс ю, рок, латино музика – шицко тото у єдней улїчки. Тиж, єст и Фабрика, Борисов ателє, Тунел, журки на Штранду, Шутиранє…
Препорученє 6. – Принєш бициґлу!!!!!
Бициґла ци будзе найлєпша пайташка у Новим Садзе. Нє будзеш мушиц чекац городски автобус, предрильовац ше през гужву, нїч ци нє будзе далєко и на бициґли ши годна ношиц ствари. Послухай ме, нє спреведнєш ше.
Препорученє 7. – Кадзи на бициґли?
Окрем факултета, на бициґли можеш нащивиц и Каменїцки парк, Креативни Дистрикт, плажи Бетярац, Шодрош и Официрац, Алмашки конєц, або Партизански теметов на Новим теметове. Кед ци тоти дестинациї допию, можеш пойсц и до Футоґу, и далєй.
Препорученє 8. – Ґрупи и апликациї
Кед ме нє сцеш послухац и гонїц бициґлу, вец знєй „NS Smart”, апликацию за шицки информациї и городски автобуси. За информациї о збуванюх, єст апликация „NewNow”. Кед жиєш у студентским доме, опитай ше дакому най це уруци до домскей Вибер, або ВотцАп ґрупи. На Фейсбуку ше учлень до ґрупи свойого факултета и ґрупи „Служба змесценя”.
Препорученє 9. – Дзе учиц?
Кед ше нє можеш сконцентровац у доме, або квартелю, вец уч у читальнї. Кажди факултет ма свою читальню. Окрем факултетох, можеш учиц и у ОПЕНС-у и у читальнї Матици сербскей. Кед красна хвиля, велї студенти ше пририхтую за испити и на Штранду.