ЯНКО РАМАЧ народзени у Руским Керестуре 22. марца 1955. року. Ту закончел основну школу и ґимназию 1975. року. Закончел и штири класи класичней ґимназиї у Риме. На Филозофским факултету у Новим Садзе 1980. року закончел студиї историї. Маґистровал на Филозофским факултету у Беоґрадзе (1990), а докторску дисертацию з обласци историї Руснацох одбранєл у Ужгородзе (1995).
Робел у Войводянским музею як кустос за историю Войводини у ХVІІІ вику (1980–1984), а од 1984. року робел на Филозофским факултету у Новим Садзе, на Оддзелєню за русинистику, од 2007. року у званю рядового професора, од 2015. року у двох мандатох як шеф Оддзелєня за русинистику. Бул и професор на Филолоґийним факултету у Беоґрадзе и госцуюци професор у Нїредьгази у Мадярскей. Преподаваня тримал на вецей словацких Универзитетох, у Ґданьску и Вроцлаве у Польскей и у Львове и Ужгородзе у України.
Обявел вецей як сто науково роботи у наукових часописох и зборнїкох. Участвовал на велїх наукових конференцийох у жеми и иножемстве: у Новим Садзе, Беоґрадзе, Нишу, Бекешчаби, Дебрецину, Кечкемету, Нїредьгази, Пряшове, Свиднїку, Ужгородзе, Львове, Познаню, Слупску, Брну. Од 2002. року трима преподаваня з Историї України и Историї українскей култури на Катедри за українистику на Филолоґийним факултету у Беоґрадзе.
Обявел шейсц моноґрафиї: Привредни и дружтвени живот Руснацох у Южней Угорскей (1990), Кратка история Руснацох (1993), Школа у Руским Керестуре (1753-1918) (1995). Його преширену докторску тезу обявела Войводянска академия наукох и уметносци 2007. року под насловом Руснаци у Южней Угорскей (1751-1918) паралелно по руски и по сербски. Тота кнїжка на понад 500 бокох представя найподполнєйшу историю нашого народу у Южней Угорскей од його приселєня.
Науково роботи писал на руским, сербским и українским язику, а публиковал и на анґлийским и словацким язику. Вєдно з библичаром др Тадейом Войновичом и Михалом Рамачом преложел Нови Завит на руски язик зоз старогреческого язика и закончел преклад Старого завиту тиж зоз старогреческого на руски язик. За тото подняце папа Франциск одликовал го з Орденом витяза сватого папи Силвестера.
Траґично настрадал у транспортним нєщесцу 27. авґуста 2022. року.