НОВИ САД – Як школяре вошли до лавкох, так и часопис МАК вишол зоз друкарнї же би их привитал у новим школским року.
Найновше виданє часописа МАК 08-09 (авґуст-септембер) ма тему „Грих”, а читаче можу пречитац рижни тексти од животного штредку, прейґ моди по Шветове прешенство у фодбалу.
На початку, уж звичайно, находзи ше визуално-ґрафични приказ податкох о ґлобалним зогриваню. Потим читаче можи пречитац приказ филма „Здрави людзе за розвагу” хтори на специфични способ приказує национални заєднїци у Войводини.
Понеже тема числа „грих” – читаче можу пренайсц и тексти хторим то главна теза – „Грих у моди” о уплїву швидкей моди на людзох и животни штредок и прейґмирним купованю, и „Грих нє вихасновац нагоду” – о Шветовим першенстве у фодбалу, а на єдним зоз змаганьох була и Мелинда Хома, хтора подзелєла зоз нами упечатки.
Кед слово о активносцох младих, ту и тексти о путованьох зоз фолклором зоз хторим млади нащивели Польску и Словацку Републику, та и о музичним фестивлау „Водова фест” хтори, после вецей рокох ознова отримани на базену у Руским Керестуре, а єдни з орґанизаторох були и млади зоз Здруженя „Пакт Рутенорум”.
Мож пречитац и поезию и прозу, як и опатриц диґитални колаж, упознац ше зоз авторками Емисиї за младих на Радио Новим Саду и їх процесу правеня радио емисиї, роздумованє о першим гриху, як и розбиванє слики кед слово о новим руху традицийней супруги (tradwife).
Лексикон пополнєла Сара Надрлянски.