РУСКИ КЕРЕСТУР – У Руским Керестуре, того викенду, 22. авґуста, отримана 14. манифестация Днї керестурскей паприґи, на чесц єдному од найпрепознатлївших продуктох того валалу.
Цалодньова програма почала уж од предполадньових годзинох, кед ше рихтало рижни файти єдлох у котлох за нащивительох, док урядова часц манифестациї почала на 17 годзин зоз дефилеом коньских запрагох през главну улїцу валала.
Дефиле орґанизовал Конїцки клуб Русин, а после преходу запрагох през централну улїцу манифестация предлужена зоз културно-уметнїцку програму.
Програму урядово отворел предсидатель Здруженя продуковательох паприґи Capsikum annum Владимир Варґа, хтори привитал присутних и наглашел же за отримованє манифестациї Општина Кула того року нє додзелєла средства. Прето орґанизаторе средства за реализацию програми були примушени глєдац од жительох, односно власнїкох локалних фирмох и привреднїкох зоз валалу, хтори дали добродзечни прилоги, а зоз чим оможлївели же би ше манифестацию заш лєм отримало и того року.
Публики ше, у културно-уметнїцкей часци, представели наймладши валалчанє Дзецинскей заградки Цицибан, односно його Музичней оводи хторих пририхтала Тат’яна Фейди, потим фолклорни ансамбл Дома култури Руски Керестур, а свой репертоар представела и женска ґрупа Ария хтора одшпивала даскельо шпиванки.
У предлуженю програми преглашени и побиднїки у змаганьох хтори и того року були часц манифестациї. Так, награди за три найчежши паприґи достали – Рада Рисимович чия паприґа мала 451 ґрам, Ема Шимек (413 ґрами) и Елемир Надь (398 ґрами), док награди за найлєпши штанд достали Михайло Летвенчук и Дарко Планчак.
Окремну увагу прицагли наймладши Керестурци, хтори ше, уж по традициї, представели у своїх креативних маскох зоз мотивами паприґи, та орґанизаторе и їм додзелєли награди за найкреативнєйше обдумани маски.
Манифестация и того року позберала красне число викладачох дзе ше представели и хемийни и нашеньски хижи, а нащивителье могли купиц и рижни продукти домашнього виробнїцтва и сувенири.
Музична часц вечара предлужена зоз наступом ґрупи Касиус, а потим наступел и бенд Дрвена банда.
