ДЮРДЬОВ – На тогорочним, 23. Фестивалу жридлового шпиваня „Най ше нє забудзе” всоботу, 22. авґуста у змагательней часци участвовали дзевец шпивацки ґрупи зоз осем наших местох.
Побиднїцку награду на Фестивалу жридлового шпиваня достала Дзивоцка шпивацка ґрупа Културно-уметнїцкого дружтва „Тарас Шевченко” зоз Дюрдьова, а пририхтали их Ксения Вереш и Валентина Салаґ. Шпивацку ґрупу провадзел оркестер Дружтва. Специялну награду достала Хлопска шпивацка ґрупа Руски културни центер з Нового Саду, а за наступ их пририхтал Борут Павлич.
Фестивал урядово отворел предсидатель Националного совиту Руснацох Стеван Самочета, а у публики були присутни и член Општинскей ради Општини Жабель задлужени за културу Зоран Пинїч, священїк о. Борис Холошняй и директорка ОШ „Йован Йованович Змай” Любица Клепич.
После урядового отвераня фестивалу, перши, як то обичай, наступели прешлорочни побиднїки, Женска шпивацка ґрупа РКУД „Др Гавриїл Костельник” зоз Кули. Потим, на ше на бини зменьовали и шпивацки состави: Мишана ґрупа КПД „Карпати” зоз Врбасу, Мишана ґрупа зоз КПД „Дюрда Киш” зоз Шиду, Мишана ґрупа Дружтва Руснацох зоз Суботици, Женска ґрупа Дом култури Руски Керестур, Мишана ґрупа КУД „Яким Ґовля” зоз Миклошевцох зоз Републики Горватскей и Хлопска ґрупа зоз РКУД „Др Гавриїл Костельник” зоз Кули.
У ревиялней часци участвовала Шпивацка ґрупа „Варґоч” Вера Салонски и пайташки зоз Жаблю, котри виведили вецей сербски жридлово шпиваки и єдну руску жридлову народну шпиванку. После наступа шицких ґрупох, а под час ревиялней часци, фахови жири у составе: Агнета Тимко Мудри, Весна Медєши и Любица Отич вибрали побиднїка и добитнїка специялней награди.
Шицки ґрупи, учашнїки на фестивалу, од орґанизатора достали дарунок, древену шамлочку котру зоз народнима мотивами и назву фестивалу прикрашели млади зоз КУД „Тарас Шевченко”. Конферансу водзели Кристина Хромиш и Никола Тиркайла, а дарунки шпивацким ґрупом доручовали Михайло и Александра Пап.
И тогорочни Фестивал жридлованя шпиваня „Най ше нє забудзе” отримани у дворе валаскей Основней школи „Йован Йованович Змай”, орґанизатор КУД „Тарас Шевченко”, под покровительтвом Покраїнского секретарияту за културу, явне информованє и одношеня зоз вирскима заєднїцами АП Войводини, Националного совиту рускей националней меншини, Заводу за културу войводянских Руснацох, Општини Жабель и ОШ „Йован Йованович Змай”.
После фестивалу дружнє зоз шпиванку и танцом, ше преслужело у просторийох домашнього Дружтва.
