НОВИ САД – У найновшим 36. чишлє новинох „Руске слово” на боку Интермецо представена кнїжка „Саскачеван мой други дом”. На Тижньовнїку розгварка зоз Збиженеком Залиньским о ровноправносци и инклузиї, хтори бешедує о тим же медиї треба же би представяли цале дружтво.
Боки Нашо места пишу о валалских лєтних огньох, вашарскей часци кирбаю у Коцуре, промоциї двоязичней антолоґия поезиї у Коцуре, и же направене нове бавилїще за дзеци у Дюрдьове. Зишли ше и вецей ґенерациї цо ходзели до основней школи у Кересутре, а млади у Дюрдьове мали алога парти.
Боки култура и просвита пошвецени початку нового школского року, з окремну увагу на перши класи у Руским Керестуре, Коцуре и Дюрдьове, дзе нєт оддзелєнє на руским язику, у Коцуре уписани 5 школяре до прешей класи до руского оддзелєня, а у Руским Кересуре 45. Тиж ту и напис о керестурскей ґимназиї дзе ше до руского оддзелєня уписали 7 школяре.
На бокох економиї тексти о проєкту министерства привреди, о збераню амбалажи зоз пестицидох, шидянски парасти нєзадовольни зоз одкупну цену слунечнїку бо є барз нїзка и о реґенеративней польопривреди. На рубрики Людзе, роки, живот представена Ирина Цап, хтора зоз квецом и ближнїма преживює старосц.
На Духовним боку мож пречитац о наших кирбайох у Коцуре, Бикичу и Индїї дзе нови парох будзе о. Ярослав Варґа. Дружтво предлужує 9. часц фельтона зоз кнїжки „Як гуторя дїдове, швет бул давно иншаки” о. Владимира Еделинския Миколку.
На бокох Спорту тексти о фодбалским клубу „Бачка 1923” Дюрдьов, и мемориялним турнире „за Мариа” на хторим бавели 46 екипи. У Руским Керестуре бул турнир у баскету „3 на 3” и змаганє у вареню рибового котлїка. Фодбалере коцурскей Искри прешвечлїво победзели Аду.
Вишли додатки Мозаїк и Дикица, а Горуци тепши даваю рецепт як увариц зашечени брескинї.