НОВИ САД – Дунайски парк, на нєдзелю, 6. септембра будзе балетска сала на отвореним, понеже ше отрима явну балетску годзину Балет у парку.
Першираз у Новим Садзе на отвореним у Дунайским парку публика годна буц присутна на явней годзини балету, праве такей яку танцоше маю каждодньово, алє и пред пробу и наступом на представи. Будзе то нагода видзиц яки напарти и витримовни пририхтованя маю професийни танцоше балету у Сербским народним театре (СНТ) скорей як ше их одпатри на сцени.
Явну годзину будзе водзиц педаґоґа зоз Куби Ивет Родриґез, зоз провадзеньом на клавире пиянисткинї зоз Греческей Антули Барле.
Инициятиву порушала директорка Балета СНТ Ая Юнґ, жадаюцу балет приблїжиц гражданом и отвориц простор на хторим ше стретню уметносц и заєднїца.
Орґанизованє явней годзини балету потримали Покраїнска влада Войводини и Город Нови Сад.
Нєкаждодньова подїя Балет у парку почнє на нєдзелю на 17 годзин у Дунайским парку.