НОВИ САД – Гражданє хтори можу и жадаю помогнуц тим хторим крев необходна можу дац крев у наиходзацих дньох на вецей локацийох у Новим Садзе и у вецей местох, акциї орґанизує Завод за трансфузию креви Войводини.
Нєшка трансфузиомобил будзе у центре Нового Саду од 17 до 20 годзин, а крев годно дац и у Сримскей Митровици, Зренянину, Пиньвиц, Деспотове, Ковилю и Ґардиновцох.
На стреду гражданє годни дац крев на Институту за польодїлство у Новим Садзе од 9 до 11 годзин, и у Панчеве, Зренянину, Молу, Каравукове и Сербским Милетичу.
На штварток трансфузиомобил будзе опрез Спенсу од 18 до 20 годзин, а крев годно дац и у Сримскей Митровици, Зомборе, Оджаку, Вершцу и Зренянину.
На пияток крев годно дац у трансфузиомобилу у центре Нового Саду од 10 до 13 годзин, потим у Вербаше, Новей Пазови и у Бачким Петровим Селу.
Екипи Завода за трансфузию креви предлужа акцию и на соботу, 25. юлия у Новим Садзе у центре од 17 до 20 годзин и у Ґакову.
Крев мож дац кажди роботни дзень у Заводу за трансфузию креви Войводини од 7 по 19 годзин, як и каждей першей соботи у мешацу од 8 по 12 годзин.
Даватель креви може буц кажада здрава полнолїтна особа хтора сполнює основни здравствени условия. Зоз Заводу за трансфузию поволую гражданох най ше одволаю на акцию и зоз своїм гуманим ґестом помогню у обезпечованю резерви креви.