Адриани Надь награда публики

автор мар
969 Опатрене

РУСКИ КЕРЕСТУР − Всоботу, 17. марца, на 50. Драмским мемориялу ґлумци Драмского студия „Арт” Дом култури Руски Керестур други раз одбавели представу „Жени” Алда Николая, за котру режию и адаптацию подписує Владимир Надь Ачим.

Представа конципована зоз шейсц монодрамох, кажда монодрама тирва коло 10 минути, цо и цалком досц же би ґлумци винєсли свою улогу на високим уровню. Дїло указує на так далєки, а знова блїзки дуализми − шлєбоду и гарешт, любов и мержню, богатство и худобство, задовольство и бриґи.

Судьбу жобрачки Дьоконди представела Леонтина Штефанко, а Емилия промискуитетней прешлосци бул Андрей Орос. Кристина Афич ше нашла у улоги Корнелиї, панї котру преґажел власни продукт, а искусна Адриана Надь була у улоги мидлярки Франчески котра ше бори з опсесивно-компулзивним поремеценьом. Богату ґдовицу Олимпию ґлумела Силвия Малацко, а розтрешену жену з виражену аґорафобию Диомию автентично одґлумела Ребека Планчак.

На тот завод могло обачиц векшу убавеносц, поязаносц до цалосци и превозидзени проблеми на сцени котри могло обачиц на самей премиєри пред тижньом. Доробени и дзепоєдни хвильки, а часточно и текст. Ґлумци лєгчейше винєсли трему, дзекуюци чому отримали повагу публики по сам конєц. Жири награду публики за найлєпше одбавену улогу додзелєл Адриани Надь.

Представи на тот завод присуствовал и селектор Општинскей драмскей смотри Давид Кецман, котри после виводзеня през дискусию зоз ґлумцами и режисером дал зауваги, та и похвалєл виводзенє. Визначел добру дикцию, а указал на слабу шминку ґлумцох цо, як гварел, обовязне у таким дїлу.

Вецей фотоґрафиї мож поопатрац у нашей фотоґалериї.

IMG_7026

ПОВЯЗАНИ ТЕКСТИ