Здруженє гражданох „Pact Ruthenorum” од фебруара ма нову предсидательку, Ясну Медєши, матурантку руского оддзелєня керестурскей Ґимназиї „Петро Кузмяк”, хтора уж даскельо роки и активна членїца того младежского Здруженя.
Понеже закончени мандат прешлого Управного одбору и предсидателя „Пакту” Якима Виная, у Руским Керестуре 10. фебруара отримана Виберанкова скупштина „Pact Ruthenorum”-у, а на нєй активни члени Здруженя виберали нове руководство. Попри тим же Ясна вибрана за предсидательку, Дарко Папуґа вибрани за подпредсидателя, а вони двойо и у Управним одборе, як и Томи Рац, Иван Киш и Андрей Пап, шицки зоз Керестура.
– Найбаржей сом ше двоєла чи буц предсидателька лєм прето же того року закончуєм шредню школу и уписуєм ше на факултет, та нє вше будзем у Керестуре. Но, прилапела сом, бо ми „Пакт” барз мили, як и Керестур, и пачи ше ми активносц з младима у заєднїци. Вшелїяк же будзем приходзиц дому вше кед сом годна и намагац ше цо лєпше робиц тоту роботу – почина Ясна бешеду за МАК.
Вона ше учленєла до того младежского Здруженя кед була перша класа штреднєй школи, та з оглядом на тото же є уж даскельо роки у „Пакту”, робота єй нє страна. Зна, гвари Ясна, як шицко фунционує, кельо часу треба за орґанизованє даєдних збуваньох, та прето дума и же єй нє будзе барз чежко окончовац длужносци предсидательки.
– Пред тим як сом ше учленєла до „Пакту”, нє знала сом же цо то точно. Здогадуєм ше же нас зволали на схадзку, потолковали улогу „Пакту” и гварели же ше можеме учленїц кед сцеме. Шицки зме прилапели, бо нам випатрало интересантне, медзитим, нє остали шицки, лєм тоти хторих то наисце интересовало. Тераз чежко повесц же кельо точно маме членох, алє активних нас єст коло дзешецеро. Док Цумай бул предсидатель, була сом дакущичко активнєйша як други, упознатша зоз шицким, и прето ше дакус и обчековало одо мнє же будзем предсидателька – толкує Ясна.
ОРҐАНИЗОВАЦ КИНО НА ОТВОРЕНИМ
Мандат предсидателя „Pact Ruthenorum”-у тирва штири роки, а Ясни за початок, циль предлужиц тото цо започате остатнїх рокох.
– Думам же то важне, бо Яким барз добре робел и треба же бизме предлужели по його драги. Кед вон пришол, настал нови, иншаки „Пакт”. Маме нови фестивал, даєдни свойо ствари, опрему хтора нам потребна – визначує нова предсидателька „Pact Ruthenorum”-у и додава же тото цо сиґурне то же и того року будзе фестивал „PactON” и манифестация „Дньовка”, а можебуц буду отримани ище даєдни змисти за младих.
– За роздумованє же цо би ище могло орґанизовац, алє єдна з идейох то кино на отвореним, наприклад, у Старей школи, як цо уж раз було. Младежи хиби кино у валалє, бо ми барз любиме филми. Млади найбаржей глєдаю журки, лєм проблем же ше их нє финансує, а „Пакт” обезпечує пенєжи праве прейґ писаня проєктох – гвари Ясна.
Нова предсидателька фокусована на тото цо можу и цо треба же би робели, та додава же нє вельо роздумує о тим цо би любели, алє припознава же шицки дзешка маю на розуме Младежски дом.
– Нєт вельо шанси же Општина да „Pact Ruthenorum”-у Младежски дом, алє ми би то и далєй барз любели и будземе ше и далєй бориц. Вон би бул отворени за шицких младих, можебуц би, як и скорей, там були даяки проби, спортски активносци, журки… Плануєме и преширйовац „PactON”, алє треба розумиц же вон нє замена за „Водову фест” и нїґда то анї нє будзе. Фестивал уж з рока на рок рошнє, правда же помали, алє за тото заш лєм треба часу – наглашує Ясна и визначує же проблеми з хторима ше зочую у „Пакту” то углавним финансиї, гоч ше им, якош, вше даяк уда за нїх знайсц.
Отворени су за нових членох и нови идеї
Кед дахто ма предкладаня за даяки нови идеї и сотруднїцтва, Ясна гвари же ше єй може явиц на Фейсбук, лєбо на мейл lleuad12@gmail.com, як и на „Пактов” мейл – pactruthenorum@gmail.com. Тиж так, „Пактовци” вше отворени и за нових членох.