Обще познате же єден од важних факторох за здравє орґанизма то и порядна физична активносц. Вона може буц у розличних формох, анаеробна, аеробна, у терховнї, на отвореним, у сали за вежбанє, дома…
У литератури хтора промовує здравє през занїманє зоз спортом звичайно ше гутори же нам физична активносц оможлївює: пошвидшованє метаболизма, та так и швидше худнуце (кед ше ма звишок тїлесней чежини), же зменшує уровень стреса – понеже зме после вежбаня опущенши и розтерхованши, паралелно зоз тим ше звекшує уровень енерґиї, бо зоз здобуваньом кондициї кажда шлїдуюца активносц, або вежбанє будзе лєгчейше, капацитет плюцох ше звекшує, окреме кед ше робя аеробни вежби, змоцнює ше шерцо, лєпше ше шпи, порушує ше диґестивни тракт, пошвидшує ше циркулацию и зменшує кревов прицисок, зменшує ше ризик од цукровей хороти.
Зоз визуалного боку, порядна физична активносц доприноши тому же би цело постало зацагнутше, мускули формованши, та так и триманє постало правилнєйше. Медзитим, часта вигварка на хтору ше наиходзи, на першим месце, то нєдостаток часу, а шлїдуюца то же места за вежбанє баржей за младих. Понеже ми зоз особного искуства познати обидва „боки медалї” т. є. знам и як то кед ше ма часу за вежбанє, а знам и як то кед ше часу наисце нє ма, мойо огляднуце одноши ше, у першим шоре, на ришеня праве того проблема, а вецка и на нєдостаток мотивациї рушац ше, лєм зато же треба висц зоз обисца и буц дзешка дзе ше ма чувство же ше нє припада.
Под упечатком даякей файти общого информованя и я думала же кажда особа, з цильом же би отримала свойо здравє, треба же би вежбала голєм годзину дньово, спрам своїх можївосцох и кондициї. Шейдзешат минути можебуц анї нє звучи так вельо кед ше спатри цала слика позитивних пошлїдкох, медзитим, тото цо ше нє раз вихаби то же на место т. є. дестинацию вежбаня треба пойсц, порихтац ше – вжац опрему, шмати за преблєканє, ручнїк, фляшку з воду и подобне, а вец ше отамаль треба и врациц. Дакому шицко вєдно треба годзина и пол, а хто бива далєй, та треба же би и допутовал, або ше длужей збера, треба и два годзини, або и кус вецей.
Кед сом мала часу за цали тот процес пририхтованя, и три и пол годзини ми нє було чежко видвоїц за вежбанє, а вецка сом у єдней хвильки то вецей нє жадала робиц, та сом одлучела пробовац вежбац и отримовац кондицию на радикално иншаки способ. Вежбанє сом „преселєла” зоз терховнї до дньовей хижи, а час зоз три и пол годзини сом скрацела на максимално пол годзини. Понеже сом почала робиц тренинґи високого интензитету, по интервалох, такволани HIIT, нє було анї виводлїве же бим вежбала длужей як 15, або 20 минути, а по першираз сом була примушена хасновац свойо цело и свою основну чежину за робенє шицких вежбох хтори ми требали дац и резултати у смислу напредованя.
На самим початку ми пременка зоз вежбаня у терховнї на вежбанє дома нє „спадла” лєгко, бул потребни єден период же бим ше звикла на подполну пременку. Понеже и нєшка вежбам дома, зоз минималну опрему, зоз свойого искуства можем повесц цо за мнє предносци, а цо нєдостатки такого вежбаня.
Предносци
- Нєт потреби окреме ше рихтац и паковац ствари
- Тренинґ мож поробиц кеди ґод ше ма часу
- Нє стрета ше особи хтори нам нє одвитую, а хтори маме обичай стретац на тренинґу
- Нєт потреби куповац окреме облєчиво за вежбанє
- Шпорує ше час на одход и приходзенє
- Нє чека ше у шоре за реквизит
- Температура у просториї ше лєгко виконторолує
- Мож вежбац и у дворе (хто го ма)
- Мож вежбац без даякого трошку
- Мож вежбац зоз музику по своїм смаку
- Нїхто нє запатра и нє завадза
Нєдостатки
- Нєдостаток реквизитох
- Нєдостаток креативносци цо вежбац и як вежбац
- Нєт хто указац вежби
- Нєдостаток дружтва, а зоз тим и мотивациї
- Дакеди треба поцагнуц, або склонїц мебель
- Кед ше жада мац даяки реквизит, кулї, або аж и даяку машину, муши ше видвоїц за тото пенєж
Як тоти нєдостатки претвориц до предносцох
Понеже шицки наведзени нєдостатки на даяки способ повязани, найлєгчейши способ же би ше их заобишло то кед ше дома ма интернет, понеже на интернету єст нательо широки дияпазон видеох зоз розличнима файтами тренинґох, же сиґурно можем повесц же буквално кажде може пренайсц дацо за себе. Єст числени тексти о найпопуларнейших вебсайтох и тренерох хтори маю безплатни тренинґи, хтори робя велї людзе ширцом швета. Видеа тренинґох часто конциповани так же тренер перше потолкує як ше одредзену вежбу роби, та тот хто вежба може пробовац поробиц, и аж вец почнє вежбац, кед видзи же звладал рухи. А, видео вше мож врациц и послухац ище раз. Теди кед ше вежба зоз видеом, нє вежба ше сам, бо на екрану, або у позадини „вше єст дакого”. У зависносци од того яку вельку просторию дахто ма, так ма, або нє ма потребу премесцац мебель, алє кед дакому вигварка же нє будзе вежбац, бо треба премесциц карсцель, або фотелю, вец проблем найчастейше нє у нєдостатку простору. Правда же кулї, ґиря, штранджок, або подлога за вежбанє коштаю, медзитим, мож то спатриц и з того боку же тото занавше остава нашо и кед ше раз купи квалитетни реквизит, нєт потреби куповац ознова. Окреме кед опрема желєзна.