Никола Регак, дакедишнї Керестурец, хтори тераз жиє у Нємецкей,  освоєл лиґу зоз свою екипу у Нємецкей, а того лєта бул преглашени за найлєпшого ґолмана на Турниру у Дюрдьове и участвовал на Ноцним турниру у Руским Керестуре. Кед през лєто пребувал у валалє, вихасновали зме нагоду побешедовац з нїм о його анґажованю у фодбалу.

Як ши полюбел тот спорт?

Никола Регак: Полюбел сом фодбал дзекуюци бачикови, хтори ище вше фодбалер, и сцел сом буц як и вон. Тиж так, цала моя фамелия ше занїма зоз спортом, та по такей драги и я рушел.

Яки були твойо перши крочаї у фодбалу?

НР: Започал сом их у Керестуре. Ту сом дзевец роки бранєл за „Русин”, вец сом у Словениї рок бавел за НК „Жрече”, и тераз сом перши ґолман у екипи JFV „Alsbach‒Auerbach” у Нємецкей, дзе тераз жиєме.

Хтори за це найлєпши тим у фодбалу?

НР: Наймилши тим ми „Баєрн” зоз Минхену.

Хто ци идол?

НР: Идол ми Ноєр з „Баєрну”.

Чежко войсц до екипи у Нємецкей?

НР: Досц чежко, прето же вельки клуби глєдаю вельки потенциял у бавячох и сцу видзиц намаганє на терену.

А тренинґи напарти?

НР: Барз су напарти. Треба ше барз трудзиц же би тренер видзел напредованє!

Цо обчекуєш з екипу?

НР: Тераз зме пошли за лиґу висше. Обчекованє же бизме заш лєм освоєли лиґу.

Бул ши ґолман, а бул ши и бавяч. Цо лєгчейше?

НР: Я єдноставно уживам у фодбалу. Нє важне ми на хторей позициї бавим.

Яки предносци ґолмана?

НР: Над ґолманом лєгко направиц фаул и тото же ґолман може хасновац руки.

Чи велька одвичательносц стац на ґолу?

НР: Векшином гей, алє на змаганю зме як тим, екипа. Нє маме тото же ґолман погришел, лєбо одбрана, ми сами себе гуториме – можеме победзиц!

Цо ци циль у фодбалу?

НР: Мой циль стартна постава „Баєрну” и погар Бундеслиґи и Лиґи шампионох.

Маш даяки гоби?

НР: Любим бавиц кошарку, тенис, пинґ-понґ, алє то шицко рекреативно.

Яка твоя порука младим спортистом?

НР: Же нє треба одуставац кед єст лєм єден одсто шанси и пробовац то вицагнуц до конца!