Вельки просвититель Руснацох котрого ше мало спомина

автор ядю, фото вев
1k Опатрене

НОВИ САД – Промоция зборнїка роботох о живоце и дїлу о. Дюри Биндаса и його писаней дїялносци под меном „о. Дюра Биндас (1877–1950) – национални будитель и просвититель Русинох”, котри пририхтал Михайло Биндас, отримана всоботу, 5. мая, у церкви св. Апостолох Петра и Павла у Новим Садзе.

Промоция почала зоз молитву вельочислених присутних и привитнима словами Марусї Юристи, унуки о. Биндаса, домашнього пароха о. Юлияна Раца и преосвященого владику кир Георгия Джуджара, котри у надихнутей бешеди визначел же о. Дюра Биндас положел фундаменти за национални, културни и просвитни живот Руснацох у тедишнєй Югославиї.

– Мож повесц же о. Биндас так глїбоко заорал националну бразду, же после сто рокох маме и цо орац, и на чим орац, и як орац. Най нам тот зборнїк будзе драгоказ кадзи исц далєй, же бизме и у будучносци орали и обрабяли тото польо и же би воно принєсло добри плоди.

На просвитительску и интелектуалну улогу, алє и доприношенє у вкупним живоце Руснацох на початку прешлого вику указал проф. др Янко Рамач. Вон, медзи иншим, приповедал о паноцових перших крочайох у снованю Руского народного просвитного дружтва – РНПД, на його редакторску роботу у вецей як половки Руских календарох, рочней кнїжки хтора сциговала до скоро каждого обисца, медзи двома шветовима войнами.

Професор др Дюра Гарди здогаднул присутних на трох руских синох – Гавриїла Костельника, пароха керестурского Михайла Мудрого и о. Дюру Биндаса чию роботу надпатрал и потримовал владика крижевацки Дионизий Няради. Вони започали руски културно-национални препород двацетих рокох прешлого столїтия, а яке значне їх активне участвованє у нїм видно и у тей кнїжки позарядовей вредносци.

Микола М. Цап, як рецензент того зборнїка, здогаднул на службованє о. Дюри Биндаса, после Дюрдьова, у Коцуре и Вербаше, бо праве коцурски период службованя єден з найплоднєйших периодох його вкупней културно-просвитней роботи.

Слово мал и о. Михайло Шанта котри у своєй дипломскей роботи писал о роботи о. Биндаса, а на тото завод спомнул його Молитвенїк за руски дзеци котри видруковани 1938. року, а котри бул длуго пририхтовани и гутори о свидомосци приблїжованя дзецох нашей грекокатолїцкей вири котре и нєшка окреме важне.

Водитель програми бул Микола Шанта, а промоция була преткана зоз музичнима точками Димитрия Цапа, Гелени Папуґа и Ани Римар. Нагоду виказац свойо упечатки о кнїжки и о. Биндасови, мали и присутни после урядовей часци програми.

Кнїжку видали Друкарня и видавательна хижа „Максимаґраф” зоз Петроварадину и Маруся Юриста зоз Заґребу.

ПОВЯЗАНИ ТЕКСТИ