НОВИ САД – Новинско-видавательна установа „Руске слово” подаровала кнїжку „Rusinski tradiconalni kuvar – po receptima moje majke” (prevod na srpski) вредним сотруднїцом рубрики „Горуци тепши” – Весни Медєши зоз Нового Саду и Єлени Кухар зоз Дюрдьова.
Весна Медєши и Єлена Кухар медзи найактивнєйшима сотруднїцами популарней рубрики „Горуци тепши”, котра виходзи кажди тидзень у новинох „Руске слово”. За активносц и посиланє своїх рецептох до тей рубрики кнїжку, до тераз достали Лїляна Еделински и Славица Катона зоз Руского Керестур, Лариса Цвеїч зоз Нового Саду (Сарбрукену) и Милана Младеновски зоз Жаблю.
Рубрика „Хладок и горуци тепши” виходзи у новинох „Руске слово” од 2016. року як лєтнa рубрика, а од 2018. року вона под назву „Горуци тепши” виходзи кажди тидзень.
Читаче и далєй можу посилац свойо рецепти за рубрику „Горуци тепши” на имейл: rusmak.ruske@gmail.com лєбо мож послац и по Виберу на телефони 069/673328 и 069673315.
За пейц обявени рецепти у єдним року (текст з фотоґрафиями) НВУ „Руске слово” сотруднїком дарує онлайн предплату на новини „Руске слово”, а за дзешец обявени рецепти у єдним року рочну предплату за друковани новини „Руске слово”.
