ЖАБЕЛЬ – Министарство польопривреди, лєсартсва и водопривреди – Управа за ветерину принєсла Ришенє з котрим пре потвердзене зявенє африцкей чуми швиньох у населєним месце Жабель, преглашене заражене и уґрожене подруче на териториї општини Жабель, обявене на официйним општинским сайту.
Ришенє видате вовторок, 14. юлия, а за заражене подруче преглашени полупречнїк од найменєй три километри од жридла зарази, односно од населєного места Жабель. Источашнє, за уґрожене подруче преглашени полупречнїк од найменєй дзешец километри, а котри облапя и други три општинкси места, а то Дюрдьов, Ґосподїнци и Чуроґ.
У Ришеню пише же ше на зараженим подручу запровадзує найстрогши мири з цильом зменшаня и застановйованя ширеня хороти. Мири подрозумюю еутаназию заражених швиньох, нєчкодлїве одстраньованє мертвих швиньох, забрану премесцаня и превоз швиньох без дошлєбодзеня ветеринарскей инспекциї, як и обовязне чисценє и дезификованє обєктох, превозкох и опреми котри була у контакту зоз животинями. Тиж так, забранєни уход и виход других домашнїх животиньох зоз ґаздовства без согласносци ветеринарскей инспекциї, як и предаванє и викладанє животиньох на саймох, виставох и других сходох. Купованє и предаванє меса и других продуктох зоз швиньского меса будзе оможлївене лєм у складзе зоз предписанима ветеринарскима мирами.
Африцка чума швиньох обераца вирусна хорота од котрей охорюю домашнї и дзиви швинї. Хорота нє опасна за людзох, алє виволує вельки економски пошлїдки у швинярстве и потребни строги мири контроли.
Компетентни апелую на власнїкох швиньох же би ше притримовали предписаних мирох, же би приявели кажду подозривосц на хороту компетентней ветеринарскей служби и най поступаю у складзе зоз упутствами ветеринарскей инспекциї.