РУСКИ КЕРЕСТУР – У лєшику на базену всоботу, 11. юлия, отримане змаганє у вареню паприґаша. Котизация за участвованє у змаганю виношела 4.500 динари, за цо ше достало 4 кили меса и хлєб, а приявели ше вкупно 13 екипи зоз валалу и околних местох.
Треце место, погар и палєнку достала екипа „Фамелия” зоз Керестура, друге место, погар и пакет пива достала екипа „Рукометни клуб Русин” тиж зоз Керестура, а перше место, погар и котлїк полни зоз пицом достала екипа под назву „Пиє и цепа” зоз сушедного Лалитю. Шицки наградзени тиж достали и по кнїжку Милана Добровольского – Ранчера „Ми єднаки”, хтору видала Руска матка.
Судийове на змаганю були Михайло Костелник зоз Руского Керестура и професийни кухар Даниел Фаркаш зоз Кули, хтори визначел же зоз тринац уварених паприґашох окреме ше визначел тот цо и достал перше место, а гевти други були скоро под`єднаки.
У побиднїцкей екипи главни кухар бул Юрай Турчан зоз Лалитю, хтори уж ма вельо искуства у вареню єдлох у котлїку. Вон похвалєл орґанизаторох и визначел же ше зоз своїма приятелями феноменално препровадзел на базену. Як гварел, окрем же є заводольни зоз побиду, пачело ше му и же було вельо людзох, добра музика и друженє. На питанє цо потребне же би ше уварел найлєпши паприґаш пробовал нам пояшнїц розлики у количеству цибулї, води, файти меса и других присмачкох, медзитим тото цо найзначнєйше то – искуство. Визначел же ше муши часто вариц, пробовац рижни приступи и рецепти же би ше дошло по найлєпши резултат.
Змаганє вєдно орґанизовали хлопски и женски Рукометни клуб „Русин”. То нє було перше змаганє, понеже прешлого року було подобне змаганє, алє у вареню пасулї. Орґанизаторе визначели же су задовольни зоз тим як шицко прешло, а циль змаганя було зберанє средствох за помоц обидвом рукометним клубом, окреме хлопскей екипи хтора ше у новей сезони будзе змагац у висшей лиґи.