КАНАДА/МЕКСИКО/ЗАД – Шветове першенство у фодбалу почало штварток, 11. юния, а будзе тирвац по 19 юлий, кед ше одбави вельке финалне стретнуце, на стадиону Метлайф у Америки.
Мундиял ше помали блїжи ґу концу, дзе одбавени возбудлїви стретнуца штварцини финала. Резултати шлїдуюци:
Французка – Мароко – 2:0;
Шпания – Белґия – 2:1;
Норвежска – Анґлия – 1:2 (после предлуженьох);
Арґентина – Швайцарска – 3:1 (после предлуженьох).
Полуфинални пари:
Французка – Шпания
Анґлия – Арґентина
По тераз, у закончуюцей часци Шветового першенства нашли ше репрезентациї хтори указали и найвецей, так же би ше гварело же то тераз и штири наймоцнєйши репрезентациї на швеце.
По першираз у историї штварцини финалох на Шветових першенствох бавело ше без трох найтрофейнєйших репрезентацийох, Бразила, Нємецкей и Италиї.
Репрезентация Шпаниї на тогорочним Мундиялу перши ґол достала аж у нокаут-фази, у штварцини финала.
Арґентински фодбалер Енцо Фернандез, хтори дал побиднїцки ґол процив репрезентациї Єгипту, уписал ше до историї Шветових першенствох як стрилєц 3.000 ґоли.
Ґолман анґлийскей репрезентациї Джордан Пикфорд у штварцини финала процив репрезентациї Норвежскей бранєл 18 раз на Шветових першенствох, та на тот способ постал рекордер своєй жеми.
Под час Мундияла, у Перуу 468 беби достало мено Халанд, а 91 беба достала мено Ерлинґ Халанд.
Найлєпши стрилци першенства по тераз то Меси (Арґентина) и Ембапе (Французка), хтори дали по 8 ґоли, Халанд (Норвежска) дал 7 ґоли, а провадза их Кейн (Анґлия) и Белинґем (Анґлия) хтори дали по 6 ґоли, потим Дембеле О. (Французка) зоз 5 ґолами, и Оярзабал (Шпания) хтори дал 4 ґоли.